मोटरसाइकल पल्टिंदा महत गाउँका निश्चलको निधन

भक्तपुरको सूर्यविनायक नगरपालिकामा आज भएको सवारी दुर्घटनामा एक जनाको ज्यान गएको छ । 

सूर्यविनायक नगरपालिका-९ पलासेचोकस्थित सडकमा मोटरसाइकल आफैँ अनियन्त्रित भई दुर्घटना हुँदा सोही ठाउँको महत गाउँ बस्ने २४ वर्षीय निश्चल महतको मृत्यु भएको हो । जगातीबाट साँगातर्फ जाँदै गरेको प्रदेश ३–०२–०१० प ६८९० नम्बरको मोटरसाइकल आज बिहान ९ बजे दुर्घटना भएको प्रहरीले जनाएको छ ।

दुर्घटनामा गम्भिर घाइते भएका मोटरसाइकल चालक महतलाई तत्कालै उपचारको निम्ति सूर्यविनायक नगर अस्पताल लगिएको थियो । त्यहाँबाट थप उपचारर्थ मध्यपुर अस्पताल पुर्याइएकोमा उपचारको क्रममा उनको प्राण गएको जिल्ला प्रहरी परिसर भक्तपुरले जानकारी दिएको छ ।