एमालेलाई साथ दिएन राप्रपाले, तीन ठाउँमा एक्लै उठ्ने

गत मंसिरको चुनावमा नेकपा एमालेसँग चुनावी तालमेल गरेको पूर्वपञ्चहरुको पार्टी राप्रपाले बैशाख १० गते हुने उपचुनावमा एक्लै प्रतिस्पर्धा गर्ने भएको छ । सोहीअनुसार उसले तीनवटै क्षेत्रमा उम्मेदवार टुंगोसमेत लगाएको छ । 

आज बसेको राप्रपा संसदीय समितिको बैठकले उम्मेदवार टुंग्याएको हो ।  जसअनुसार  चितवन–२ मा जीवलाल पुरी, बारा–२ सोनेलाल शाह र तनहुँ–१ मा शोभा गुरुङ उम्मेदवार छानिएका छन् ।राप्रपाले मङ्सिर ४ को चुनावमा नेकपा एमालेसँग तालमेल गरेको थियो । त्यसैको बलमा प्रतिनिधिसभामा प्रत्यक्षतर्फ ७ सहित कूल १४ सिट जितेको उ अहिले एमालेसँगै प्रतिपक्षमा छ । 

सरकार गठनदेखि बाहिरिने सम्मका निर्णयमा एमालेलाई साथ दिँदै आएको राप्रपाले उपचुनावमा भने एकल प्रतिस्पर्धा गर्न लागेको हो । एमालेले पनि तीनवटै क्षेत्रमा आफ्नो उम्मेदवार उठाउने तयारी गरेको छ ।