ट्रकको ठक्करबाट एयरपोर्टका हाकिमको बल्खुमा प्रणान्त

काठमाडौंको बल्खुमा ट्रकले ठक्कर दिँदा एक जनाको ज्यान गएको छ । आज दिउँसो साढे १२ बजे बल्खु चोकमा भएको उक्त दुर्घटनामा भूपति पाण्डेको मृत्यु भएको बताइएको छ । 

अर्घाखाँची छत्रदेव गाउँपालिका–५ स्थायी ठेगाना भई चन्द्रागिरि नगरपालिका–१२, सतुंगल बस्ने ३८ वर्षीय पाण्डेले चलाएको स्कुटरलाई मालवाहक ट्रकले ठक्कर दिँदा उक्त दुर्घटना भएको हो । दुर्घटनामा ज्यान गुमाएका उनी शाखा अधिकृत हुन् । पाण्डे त्रिभुवन अन्तर्राष्ट्रिय विमानस्थल स्थित अध्यागमन विभागको कार्यालयमा कार्यरत थिए । 

सानेपाबाट कलंकीतर्फ जाँदै गरेको बागमती प्रदेश–०३–००१ ख १७१५ नम्बरको १२ चक्के मालवाहक गाडीले सोही दिशातर्फ जाँदै गरेको पाण्डे सवार बा. प ९८३५ नम्बरको स्कुटरलाई ठक्कर दिएको थियो । 

ठक्करपछि गम्भीर घाइते भएका पाण्डेलाई नजिकैको वयोधा अस्पताल लगिएकोमा चिकित्सकले मृत घोषणा गरेका थिए । प्रहरीले ४३ वर्षीय ट्रक चालक अर्जुन ढुंगानालाई पक्राउ गरेको छ ।