गभर्नर पुग्नुअघि अर्थमन्त्रीलाई सेयर खेलाडीहरुको ८९ बुँदे सुझाव

अर्थमन्त्री डा. प्रकाशशरण महतलाई भेटेर सेयर किनबेचमा सक्रिय खेलाडीहरुले अर्थतन्त्र सुधार्न सुझाव दिएका छन् । उनीहरु सुझावको ८९ बुँदे ठेली बोकेर आज सिंहदरबारस्थित अर्थमन्त्रालय पुगेका हुन् ।

नेपाल उद्योग वाणिज्य महासंघको पुँजीबजार फोरमको टोलीले मन्त्रीलाई सुझाव दिएको हो । यसअघि महासंघका अध्यक्ष शेखर गोल्छाको समूहले मन्त्रीलाई भेटिसकेको थियो । तर फोरमका सभापति अम्बिकाप्रसाद पौडेललगायतको टोलीले नेपाल राष्ट्र बैंकका गभर्नर महाप्रसाद अधिकारीसहितको केन्द्रीय बैंकका पदाधिकारीहरु अर्थमन्त्रालय जानुअघि मन्त्रीलाई भेटेर झण्डै एक सय बुँदा टिपाएका हुन् ।

पौडेलले मन्त्रीलाई अर्थ मन्त्रालय, राष्ट्र बैंक, धितोपत्र बोर्डलगायत निकायबाट हुनुपर्ने सुधार भन्दै सेयर खेलाडीको पक्षमा सुझाव पेश गरेको बताइन्छ । उनीहरुको मुख्य चासो सेयर धितोको कर्जाको १२ करोडको सीमा हटाउनुपर्ने, बैंक तथा वित्तीय संस्थाले पनि सेयर खरिद गर्न पाउनुपर्ने, सेयरधितो कर्जाको पुँजी जोखिम भारलाई १०० मा झार्नुपर्ने र चुक्ता सेयर पुँजीको ४० प्रतिशत मात्र सेयर धितोको कर्जा दिन पाइने व्यवस्थालाई हटाउनुपर्ने माग छ । 

अर्थमन्त्रीलाई मौद्रिक क्षेत्रको बिफ्रिङ गर्न राष्ट्र बैंकका गभर्नर महाप्रसाद अधिकारीसहितको टोली दिउँसो ४ बजे सिंहदरबार जाने कार्यक्रम छ ।