उत्तर प्रदेशका मुख्यमन्त्रीले नेपालमा राजा मागेपछि विप्लव आगो

नेपाल कम्युनिष्ट पार्टी (नेकपा) का महासचिव नेत्रविक्रम चन्द विप्लवले भारतको उत्तर प्रदेशका मुख्यमन्त्री आदित्यनाथको पछिल्लो अभिव्यक्तिप्रति आपत्ति जनाएका छन् । 

आदित्यनाथले चैत २० गते विश्वहिन्दु सम्मेलनमा नेपालमा राजतन्त्र र हिन्दुधर्म हुनुपर्ने विवादास्पद अभिव्यक्ति दिएका थिए । उनले सार्वभौम राष्ट्रको राजनीतिक स्वतन्त्रतामाथि हस्तक्षेप हुनेगरी आफ्नो भनाई राखेपछि विप्लवले विज्ञप्ति निकालेर आपत्ति प्रकट गरेका हुन् । 

नेपालको सार्वभौमिकता, राजनीतिक स्वतन्त्रता र जनभावनामाथि भारतले ठाडो हस्तक्षेप गरेको भन्दै उनले त्यसप्रति निन्दा र भर्त्सना गरेका छन् । मुलुकको राजनीतिक व्यवस्था र धर्मबारे निर्णय लिने अधिकार पूर्णतः नेपाली जनतालाई भएको विप्लवको भनाइ छ । 

‘नेपालमा कस्तो राजनीतिक व्यवस्था हुने र बनाउने साथै धर्म मान्ने कि नमान्ने भन्ने अधिकार पूर्णतः नेपाली जनतामा छ । यतिबेला नेपालमा दलाल पूँजीवादी सत्ता र संसदीय व्यवस्था असफल भएको सत्य हो’, जारी विज्ञप्तिमा भनिएको छ,‘तर यो व्यवस्था पनि नेपाली जनताको छनोटबाट स्थापित नभई नयाँ जनवाद–वैज्ञानिक समाजवादलाई रोक्नका लागि भारत, अमेरिकालगायतको निर्देशनमा लादिएको व्यवस्था हो । यसको विकल्प र समाधान राजतन्त्र हुन सक्दैन् ।’

त्यस्तै, संसदीय व्यवस्थामा देखिएको संकटको निकास र विकल्प जनवादी गणतन्त्र या वैज्ञानिक समाजवादी व्यवस्था मात्र हुन सक्ने विप्लवको दाबी छ । 

नेपाललाई अस्थिर राजनीतिको भूमरीमा पुरेर प्रगतिशील एवम् अग्रगामी शक्तिहरुलाई कमजोर पार्न, अग्रगामी निकासलाई भाँड्न, दलालहरुको थुप्रो लगाउन विभिन्न मुलुकहरु लागिपरेको महासचिव विप्लवको आरोप छ । उनले यस्ता षड्यन्त्रबाट समयमै सचेत रहन सुसूचित गराएका छन् ।