रातभर जागेर बिहान समातियो भारत लैजान लागेको १८० किलो गाँजा

जसरी पत्रकारलाई समाचार पाउन स्रोतको जरुरी हुन्छ, त्यस्तै अपराध अनुसन्धानमा अगाडि बढ्न प्रहरीको सबैभन्दा पहिलो महत्वपूर्ण हतियार सुराक हो । सुराकीको बलमा प्रहरीले ठूलाठूला अपराधीलाई पनि कानुनको कठघरामा ल्याएर उभ्याएका छन् । हिजो बिहान पनि सुराकीकै आधारमा प्रहरीले चितवनमा झण्डै दुई सय किलो गाँजा बरामद गर्न सफल भएको छ । 

भारतीय गाडीमा लोड गरी ठूलै परिमाणमा लागु औषध गाँजाको तस्करी अघिल्लो दिन नै हुन लागेको सूचना प्रहरीले पाएको थियो । तर प्रहरीलाई छल्न हुन सक्छ, त्यो दिन त्यो ट्रक बाटोमा निस्किँदै निस्केन । सबैजसो ठूला अनि जटिल आपराधिक घटनाहरुको निष्कर्षमा पुगेर दोषी पत्ता लाउन र पक्राउ गर्न अहोरात्र खटिँदै आएका अपराध अनुसन्धानका उत्कृष्ट निरीक्षक सुवास भट्टकै कमाण्डमा प्रहरी टोली परिचालित थियो । 

रातभर जागेर भएपनि ड्युटीमा तैनाथ प्रहरी टिमले बिहान साढे ६ बजे द्यच्(ण्टन् द्दज्ञद्दड नं. को भारतीय ट्रकको क्याबिनमा लुकाइछिपाइ ल्याएको १८० किलो गाँजा च्याप पार्न सफल भएको हो । उक्त भारी मात्राको गाँजा अनि ओसारपसारमा संलग्न ट्रक र ट्रक चालक भारत पूर्वी चम्पारण बिहार रक्सौल बस्ने ३० वर्षीय कुन्दन पटेललाई हिजो बिहान नियन्त्रणमा लिएको चितवन प्रहरीले आज पत्रकार सम्मेलन गरी सार्वजनिक गरेको हो । त्योबेला ट्रक चालक एक्लै भेटिए । यसमा अरु को को संलग्न छन् ? प्रहरीले थप अनुसन्धान गरिरहेको छ । यसका लागि अदालतबाट हिजै म्याद थप गरिसकिएको जिल्ला प्रहरी कार्यालय चितवनका प्रमुख प्रहरी उपरीक्षक रामेश्वर कार्कीले जानकारी दिए । उक्त गाँजा लोथरबाट भारत लैजान लागेको बुझिएको छ ।