रास्वपालाई ढाकाको चेतावनी—मलाई ‘स्पष्टीकरण सोध्ने मुकुल ढकाल’को पोल खोल्न नपरोस्

‘मेडिकल माफिया’ दुर्गा प्रसाईंसँग दुई करोड रुपैयाँ घुस मागेको अडियो बाहिरिएपछि राष्ट्रिय स्वतन्त्र पार्टीले सांसद ढाकाकुमार श्रेष्ठसँग स्पष्टीकरण सोधेको छ । उनलाई रास्वपाबाट निलम्बन गर्दै २४ घण्टाभित्र लिखित स्पष्टीकरण बुझाउन निर्देशन दिएको महामन्त्री मुकुल ढकालले जनाएका छन् ।

सांसद ढाकाकुमारले घुस मागेको घटनाप्रति रास्वपाले आफ्नो गम्भीर ध्यानाकर्षण भएको भन्दै यसबारे छानबिन गरी तीन दिनभित्र केन्द्रीय समितिमा प्रतिवेदन बुझाउन पनि केन्द्रीय अनुशासन तथा आचरण समितिलाई निर्देशन दिएको छ । तर निलम्बित सांसद ढाकाकुमारले सामाजिक सञ्जाल र आम—मिडियामा सुनिएको आवाज आफ्नो नभएको बताएका छन्। ‘त्यो मेरो आवाज होइन । म दुर्गा प्रसाईं भन्ने मान्छे पनि चिन्दिनँ । म निर्दोष भएको थाहा पाइ–पाइ रविजी र मुकुलजीले मलाई निलम्बन गरेको पत्र पठाउनुभयो,’ उनले भने ।

आफ्नो नाम जोडेर अहिले बाहिरिएको अडियोबारे सभापति रवि लामिछाने पहिल्यै जानकार रहेको सांसद ढाकाकुमारले दाबी गरेका छन् । ‘हेर्नोस्, मलाई नराम्रो देखाउने काम पहिलेदेखि नै भइरहेको छ । सहकारीसँग पनि जोड्न खोजियो। अहिले फेरि यस्तो भनिँदैछ। यो विषयमा महामन्त्रीजी राम्रोसँग जानकार हुनुहुन्छ । तर उहाँले जानी—जानी मलाई निलम्बन गर्नुभयो,’ उनले भने, ‘मुकुलजी,हेक्का होस्, अब मैले तपाईंको पोल खोल्न नपरोस् ।’