विनोद चौधरीले लाजै नमानी २ हजार बुझे, स्वदेशमा कन्दनी, संसारमा १६४७ औं धनी
नेपालकै एक मात्र डलर अर्बपति । जसको सम्पत्ति एक वर्षमै ३० करोड डलर थपिएर एक अर्ब ८० करोड डलर पुग्यो भनिएको छ । तर, विश्वकै १९२९ औँ धनीमा दरिएका विनोद चौधरीले अर्थतन्त्र डाँवाडोल भएको आफ्नो देशको ढुकुटीबाट मासिक ९ हजार रुपैयाँसमेत दुहिरहेको प्रमाण भेटिएको छ । जात फाल्नु गहतको झोलमा भनेझैं ८/९ हजार मासिकको त कुरै छोडिदिऊँ विशेष भत्ताबापत पाइने १ हजार रुपैयाँसम्म छोडेका छैनन् । समावेशी मधेशी कोटामा कांग्रेसको केन्द्रीय सदस्य हुँदै नवलपरासीबाट सांसद चुनिएका उनले घर मर्मत शीर्षकमा संसद सचिवालयबाट मासिक ९ हजार नियमित बुझिरहेका छन् ।
संघीय संसद सचिवालयले जनाएअनुसार प्रतिनिधि सभाका २ सय ७५ सांसदमध्ये अहिले १५२ जनाले घरभाडाबापत मासिक १८ हजार बुझ्दै आएका छन् । यससम्बन्धी ऐनको दफा ६ ले भनेको छ ‘काठमाडौंमा घर नभएका प्रत्येक सदस्यलाई अनुसूची (१) बमोजिमको रकम आवास सुविधाबापत दिइने’ छ । सोबमोजिम १५२ माननीयले १८ हजार रकम राज्यकोषबाट लिँदै आएका छन् । ११२ सांसदको राजधानीमा घर भएका कारण उनीहरूले संघीय संसदका पदाधिकारी तथा सांसदहरूको पारिश्रमिक र सुविधासम्बन्धी ऐनको दफा ६ (२) बमोजिम आवास मर्मत सम्भार शीर्षकमा ९ हजार बुझ्ने गर्छन् । त्यही सूचीमा विनोद चौधरीको नाम पनि भेटिन्छ । स्रोतका अनुसार यो शीर्षकमा उनले गत पुसमा ७ हजार ३ सय बुझेका छन् । यस्तै धारा, बिजुलीबापत १६००, सञ्चार सुविधा २ हजार, विशेष भत्ताबापत ८०० बुझेको विवरण सभामुखको निजी सचिवालयले जनआस्थालाई उपलब्ध गराएको छ ।
पुस ७ गतेबाट मात्र कार्य प्रारम्भ भएका कारण सो महिनाको तलबबापत चौधरीले ५२ हजार ८५६ बुझेको प्रमाण हामीसँग सुरक्षित छ । संघीय सांसदको तलब ६६ हजार ७० रुपैयाँ छ । माघ, फागुन, चैतमा सोही बराबरको तलब बुझेका चौधरीले पछिल्लो तीन महिनामा आवास सुविधावापत ९ हजारका दरले २७ हजार लगिसकेका छन् । उनले कांग्रेस पार्टीलाई १० हजारका दरले लेबी तिर्ने गर्छन् । सन् २०१३ देखि विश्वका अर्बपतिको सूचीमा पर्दै आएका चौधरीको सम्पत्ति २०१७ मा २० करोड डलर थपिएर १ अर्ब ३१ करोड अमेरिकी डलर पुगेको थियो । सन् २०१८ मा २२ करोड डलर थपिएका फोब्र्स म्यागेजिनले जनाएको छ ।
कोभिड कालमा सबै व्यापारी सुक्दासमेत उनको सम्पत्ति १६ करोड डलरले थपियो । पछिल्लो ४ वर्षमा ३० करोड डलर आम्दानी बढेर १ दशमलव ८ अर्ब करोड पुगेको उक्त पत्रिकाले जनाएको छ । हरेक वर्ष सम्पत्ति बढ्ने तर राज्यलाई कर तिर्ने मामलामा उनी जहिल्यै पुच्छारतिर मात्र पर्दै आएको विडम्बना यही नेपालमा मात्रै देख्न पाइन्छ ।
ट्रेन्डिङ पोस्ट
टिप्पणीहरू