सुरक्षण मुद्रण केन्द्रका हाकिमविरुद्ध भ्रष्टाचार मुद्दा, नौ जनासँग पौने तीन अर्ब बिगो दाबी

सुरक्षण मुद्रण केन्द्रका कार्यकारी निर्देशक विकल पौडेलविरुद्ध मुद्दा दायर भएको छ । अख्तियार दुरुपयोग अनुसन्धान आयोगले केन्द्रका कार्यकारी निर्देशकसहित नौ जनाविरुद्ध भ्रष्टाचारको मुद्दा आज दायर गरेको छ । 

अख्तिायारले पौडेलविरुद्ध ६९ करोड ८ लाखभन्दा बढी बिगो र कैद दाबी गरेको छ । हाल वन तथा वातावरण मन्त्रालयमा रहेका केन्द्रका सिडिई नवीनकुमार पोखरेललाई ४९ करोड ४६ लाखभन्दा बढी बिगो र कैद एवम् सहायक निर्देशक रमेशप्रसाद पोखरेलविरुद्ध करिब २० करोड ३९ लाख रुपैयाँ बिगो र कैद माग दाबी गरिएको छ ।

भ्रष्टाचार मुद्दा दायर गरिएकामध्ये मेपटेक बिल्डिङ सर्भिसेजका निर्देशक भुवन महर्जनविरुद्ध ४३ करोड ५७ लाखबढी, शाखा अधिकृत शिरिष उपाध्यायविरुद्ध ४० करोड १ लाख, इञ्जिनियरिंग मार्केटिंग कन्सर्नका प्रबन्ध निर्देशक रोहितमान प्रधानविरुद्ध करिब २३ करोड ४५ लाख बिगो र कैद दाबी गरिएको छ ।

अन्यमा शाखा अधिकृत मनिकमान महर्जनले ३ करोड ४४ लाख, लेखा अधिकृत रामबहादुर बुढाले करिब १९ करोड ८९ लाख र परामर्शदाता वास्तुशिल्प एसोसिएट्सका प्रबन्ध निर्देशक मित्रलाल गुरौंले ८ लाख ६९ हजार भ्रष्टाचार गरेको आयोगले दायर गरेको मुद्दामा उल्लेख छ ।

उनीहरुले सुरक्षण मुद्रण केन्द्रले पावर सिस्टम इन सेक्युरिटी प्रिन्टिङ प्रेस एण्ड प्रृेसराइज्ड फ्युल स्टोरेज ट्याङ्कको खरिदमा बदनियतपूर्वक कार्य गरेको ठहर छ । मिलेमतोमा कमिसन लिएर ठेक्का प्राप्त गरी कार्य गरेको आयोगको अभियोगमा उल्लेख छ ।

खरिद कार्यमा अस्वाभाविक लागत अनुमान तयार गरी स्वीकृत गर्ने, सम्झौताविपरीत गुणस्तरहीन ट्रान्सफरमर स्वीकार गरेको, सम्झौताभन्दा फरक मुलुकको जेनेरेटर स्वीकार गरेर भुक्तानी गरेकाले उनीहरुले राज्यकोष दुरुपयोग गरेको देखिन आएको हो ।