टोखाको मासु पसलबाट सल्केको आगोले चार वटा पसल ध्वस्त

टोखा नगरपालिका ८ मिलन टोलमा आज साँझ आगलागी भएको छ । मिलन बजारमा धर्मराज डंगोलले भाडामा लिएर सञ्चालन गरेको ए वान मासु पसलमा लागेको आगोले नजिकैको अरु तीन वटा पसल पनि सखाप पारेको बताइएको छ ।

साँझ साढे ७ बजेको समयमा ग्यास लिक भएर आगो सल्केपछि नजिकैका दुई वटा कपडा पसल र दुध डेरीमा क्षति पुगेको हो । आगलागीबाट अन्दाजी ८० लाखको क्षति भएको अनुमान गरिएको छ ।

आगो निभाउन बालाजु औद्योगिक क्षेत्र, जुद्ध बारूद यन्त्रका एक एक वटा दमकल र एउटा पानी ट्याङ्कर परिचालित गरिएको थियो । त्यसैगरी प्रहरी वृत्त महाराजगञ्जबाट डिएसपी अंगुर जिसीको कमाण्डमा १५ जना र स्थानीय बसिन्दाको सहयोगमा आगो राति साढे ८ बजे नियन्त्रणमा आएको बताइन्छ । 

आगलागीमा मानवीय क्षति नभएको प्रहरीले जनाएको छ ।