बारामा जसपाले बुथ कब्जा गरेको भन्दै सिके राउतको हारगुहार
जनमत पार्टीका अध्यक्ष सिके राउतले बाराका दुई वटा बुथ जनता समाजवादी पार्टी (जसपा)ले कब्जा गरेको आरोप लगाएका छन् ।
पचरौता नगरपालिकाको बेलडाडी र देवताल झिपकैया बुथ जसपाका कार्यकर्ताले कब्जा गरेको उनले दाबी गरे । ती बुथमा आफ्ना प्रतिनिधिलाई प्रवेश गर्न रोक लगाइएको राउतको गुनासो छ ।
बिहानै गढीमाई दर्शन गरेर मतदान केन्द्र घुम्न निस्केका राउतले भने, ‘पचरौता नगरपालिका बेलडाडीमा हाम्रा प्रतिनिधिलाई छिर्न दिईएको छैन,त्यस्तो अवस्था देवताल झिपकैया बुथमा पनि देखिएको छ ।'
आफूले हिजै जसपाले बुथ कब्जा गर्नसक्ने भन्दै स्थानीय प्रशासनलाई खबर गरेपनि बेवास्ता गरिएको पनि राउतले बताए । ‘मैले हिजोदेखि नै जसपाले बुथ कब्जा गर्न खोजेको भनेर प्रहरी प्रशासनलाई जानकारी दिएको थिएँ तर अहिलेसम्म हाम्रो कुराको सुनवाई भएको छैन’, उनले भने ।
प्रहरी प्रशासनको मिलेमतोमा नै जसपाले बुथ कब्जा गरेको दाबी गर्दै उनले सम्बन्धित निकायको ध्यानाकर्षण गराएका छन् ।
बारा–२ मा जसपाबाट केन्द्रीय अध्यक्ष उपेन्द्र यादव र जनमत पार्टीका शिवचन्द्र कुशवाहा उम्मेदवार रहेका छन् । यी दुईबीच नै मुख्य प्रतिष्पर्धा हुने अनुमान गरिएको छ ।
टिप्पणीहरू