रवि लामिछानेले माफी मागेपछि माहौल मत्थर

राष्ट्रिय स्वतन्त्र पार्टी (रास्वपा) ले आचारसंहिता उल्लंघन गरेको स्वीकार गर्दै माफी मागेपछि चितवनको नयाँ किरण मावि मतदान केन्द्रमा रोकिएको मतदान पुनः शुरु भएको छ । 

भर्खरै सम्पन्न सर्वदलीय बैठकमा रास्वपाका प्रतिनिधिले गल्ति स्वीकार्दै अबदेखि आचारसंहिता मिच्ने काम नहुने प्रतिबद्धता जनाएपछि अन्य दल मतदान सुचारु गर्न सहमत भएका हुन् । रास्वपाका तर्फबाट क्षमायाचना गर्ने, आचारसंहिता उल्लंघन गरेको जानकारी मुख्य निर्वाचन कार्यालयलाई लेखेर पठाउने र मतदान सुचारु गर्ने बैठकको निर्णयमा लेखिएको छ । 

भरतपुर महानगरपालिका–११ स्थित नयाँ किरण माविमा बिहान सवा ११ बजेदेखि मतदान रोकिएको थियो । रास्वपाका सभापतिसमेत रहेका चितवन क्षेत्र नम्बर २ का उम्मेदवार रवि लामिछानेका समर्थकहरुले मतदातालाई प्रभावमा पार्न नाराबाजी गरेको भन्दै एमाले कार्यकर्ताले आपत्ति जनाएपछि उत्पन्न विवादले मध्याह्न रोकिएको मतदान सर्वदलीय सहमतिपछि भर्खरै सुचारु भएको हो ।