पूर्वमा अध्यक्ष ‘लखेटिएको’ विरोधमा एमालेका सांसदहरु जर्याकजुरुक जुठे

प्रमुख प्रतिपक्षी दल नेकपा एमालेका सांसदहरुले आफ्नो पार्टीका अध्यक्षमाथि झापामा भएको ‘आक्रमण’ को विरोध संसद बैठकमा गरेका छन् । आजको प्रतिनिधिसभा बैठकम सुरु भएलगत्तै एमालेका सांसदहरुले उठेर विरोध जनाएका हुन् । 

सभामुखले बैठक सुरु भएको बताएलगत्तै एमालेका सांसदहरु आफू बसेको सिटबाट उठेर विरोध गर्न थाले । त्यसपछि सभामुख देवराज घिमिरेले त्यस पार्टीका प्रमुख सचेतक पदम गिरीलाई बोल्न समय दिए । गिरीले झापामा अध्यक्ष ओलीमाथि आक्रमण भएको र सरकारले दोषी पत्ता लगाउन नसकेको भन्दै चर्को असन्तुष्टि पोखे । 

घटनाका दोषीलाई कारबाही गर्न तथा अवान्छित गतिविधि गर्नेलाई नियन्त्रणमा लिन सरकार असफल भएको उनको आरोप थियो । बैशाख १३ गते गृहजिल्ला झापाको एउटा कार्यक्रममा भाग लिन पुगेका ओलीलाई पहिचान पक्षधर समूहले नाराबाजी गर्दै बाटो अवरोध गर्ने प्रयास गरेको थियो । 

कोशी नामकरण सच्याउन माग गर्दै लामो समयदेखि आन्दोलनरत पहिचानवादीहरुले भने ओलीकै निर्देशनमा कोशी नाम राखिएकाले उनी सहभागी कार्यक्रममा शान्तिपूर्ण विरोध प्रदर्शन गरेको बताउँदै आएका छन् । एमाले अध्यक्षमाथि कुनै आक्रमण नभएको उनीहरुको दाबी छ । 

तर, एमाले नेताहरुले भने आफ्ना अध्यक्षमाथि सत्तापक्षबाट नियोजित हमला भएको आरोप लगाइरहेका छन् । यद्यपि उक्त घटनामा संलग्न रहेका केही व्यक्तिलाई प्रहरीले उत्तिखेरै पक्राउ गरेको थियो । एमालेका सांसदहरुले माओवादीका ‘अयोग्य लडाकु’ लाई सरकारले राहतस्वरूप दुई लाख वितरण गर्ने तयारी गरेको भन्दै विरोध गरेका छन् । अहिले संसद बैठक भने चलिरहेको छ ।