आविष्कार केन्द्रलाई कवाडी भन्नेलाई महावीरको मुखभरीको जवाफ, ‘आफैं आएर हेर्नुहोस्’

राष्ट्रिय आविष्कार केन्द्रका संस्थापक महावीर पुनले आविष्कार केन्द्रलाई ‘कबाडी केन्द्र’ भन्नेहरुलाई चूनौती दिएका छन् । 

आज सामाजिक सञ्जाल फेसबुकमा स्टाटस लेख्दै उनले अझै पनि राष्ट्रिय आविष्कार केन्द्रलाई कबाडी केन्द्र भन्ने गरेको भन्दै केन्द्रले नवउद्यमी उत्पादन गरिरहेको दाबी गरेका छन् । 

‘अझैपनि राष्ट्रिय आविष्कार केन्द्रलाई मर्मत केन्द्र र कबाडी केन्द्र भन्नेलाई जानकारी । विश्वास लाग्दैन भने आफैं आविष्कार केन्द्रमा आएर आफैंले हेर्नुहोस्,’ महावीरले भनेका छन्, ‘आविष्कार केन्द्रमा आएर अनुसन्धान गरेका दुई जनाले पेटेन्ट पाइसके र अरु दुई जनाले निवेदन दिएका छन् ।’

त्यस्तै, आजसम्म ६ जना नवउद्यमी बन्दा चार समूह नवउद्यमी बन्ने प्रक्रियामा रहेको उल्लेख गर्दै उनले अहिले नियमित ७२ जना आविष्कार केन्द्रमा रहेको बताएका छन् । महावीरले केन्द्रमा जुन सुकै क्षेत्रमा पनि अनुसन्धान गर्न सकिने जानकारी दिदैँ अनुसन्धान गर्नेहरुलाई सबै सामान निःशुल्क रुपमा उपलब्ध गराइरहेको जनाएका छन् । 

‘म उद्यमी बन्ने होइन । धेरैभन्दा धेरै भाई बहिनीलाई सकेसम्म उद्यमी बनाउने हो । यहाँ राम्रो आइडिया लिएर आई अनुसन्धान गर्नेहरुले सबै सामानहरु निःशुल्क पाउँछन् । खान, बस्न पाउँछन्,’ उनले भनेका छन् ।