गृहमन्त्रीले खुट्टा नकमाउने काँग्रेस नेताहरुको विश्वास

नेपाली काँग्रेसका युवा नेताहरुले नक्कली शरणार्थी खडा गरेर करोडौँ कुम्ल्याउने गिरोहमा संलग्न सबैलाई अनुसन्धानको दायरामा ल्याउन माग गरेका छन् ।

काँग्रेसका तेस्रो पुस्ताका नेताहरुले आज गृहमन्त्री नारायणकाजी श्रेष्ठलाई भेटेर यस्तो माग राखेका हुन् । आफ्नै पार्टीका नेतासमेत रहेका पूर्वगृहमन्त्री बालकृष्ण खाँण पक्राउ परेको केही घन्टामै गृहमन्त्रीलाई ज्ञापनपत्र बुझाउन पुगेका उनीहरुले कसैको प्रभाव र दबाबमा नपरी अनुसन्धान प्रक्रिया अगाडि बढाएर दोषीमाथि कारबाही गर्न गृहमन्त्री लाई सुझाव पनि दिएका छन् । 

नक्कली भुटानी शरणार्थी प्रकरणमा सरकारले चालेको कदममा ऐक्यवद्धता जनाउँदै नेताहरुले अनुसन्धानलाई निश्कर्षमा पुराउन सबैले सकारात्मक भूमिका खेल्नुपर्नेमा जोडसमेत दिएको बताइएको छ ।

ज्ञापनपत्र बुझाउन काँग्रेसका युवा नेताहरु गुरुराज घिमिरे, भुपेन्द्रजंग शाही, रञ्जित कर्ण, गोविन्द पोखरेललगायतका नेताहरु सिंहदरबार पुगेका थिए ।