अगेनाको आगोले गोठ भष्म : एउटा राँगो जल्यो, अर्को घाइते

सिन्धुपाल्चोकको चौतारा साँगाचोकगढी नगरपालिकास्थित एक गोठ जलेर खरानी भएको छ । आगलागीबाट दुई लाख मूल्य बराबरको धनमाल जलेर नष्ट भएको बताइएको छ ।  

चौतारा साँगाचोकगढी ७, नुनथलीस्थित गणेशबहादुर श्रेष्ठको गोठमा आज मध्यान्ह लागेको आगोले उक्त क्षति भएको हो । कुँडो पकाउने क्रममा अगेनाबाट सल्किएको आगोको झिल्कोले पूरै गोठ जलेर खरानीमा परिणत भएको प्रहरीले बताएको छ । 

घटनाबारे जानकारी दिँदै प्रहरीले आगलागीमा परेर गोठभित्र बाँधेको एउटा राँगो जलेको छ । अर्को एउटा घाइते भएको बताइएको छ । साथै पराल, नल, दाउरासमेत जलेर नष्ट भएको छ । 

तर आगलागीबाट कुनै मानवीय क्षति नभएको प्रहरीको भनाइ छ ।