सभामुखसँग बिरामी बिदा मागेर फेसबुकबाट आत्मसमर्पणको संकेत गरेका टोपबहादुर फेरि हराए

आज साँझ प्रहरीमा गिरफ्तारी दिने बताएका एमाले सांसद टोपबहादुर रायमाझीको वचन फेरि झुठो साबित भएको छ ।

नक्कली शरणार्थी प्रकरणमा प्रहरीले पक्राउ पुर्जी जारि गरेपछि फरार रहेका उनी यसअघि जस्तै अनुसन्धानमा सघाउने भन्दै आज पनि लापता भएका हुन् । पक्राउ पुर्जी जारी भएको एक हप्तापछि आज फेसबुकमा स्टाटस लेख्दै उनले साँझ साढे ५ बजे गिरफ्तारी दिने बताएका थिए । 

तर, यो समाचार तयार पार्दासम्म उनी पक्राउ परेको प्रहरीले औपचारिक जानकारी दिएको छैन । 

आफू बिरामी परेकाले मोबाइल अफ गरेर उपचारका लागि अस्पताल गएको दाबी गरेका रायमाझीले नक्कली शरणार्थी प्रकरणमा आफ्नो नाम मुछिएकोमा आपत्तिसमेत जनाएका थिए । आफूमाथि लागेको आरोप निराधार सावित गर्न आज साँझ साढे ५ बजे प्रहरीमा जाने उनले लेखेका थिए । 

यसअघि पक्राउ पुर्जी जारी भएकै दिन गत बुधबार सभामुख देवराज घिमिरेसँगै गृहजिल्ला अर्घाखाँचीको एक कार्यक्रममा उनी सँगै मञ्चमा देखिएका थिए । त्यहाँ स्थानीय पत्रकारसँग कुरा गर्दै उनले काठमाडौं गएर प्रहरीलाई अनुसन्धानमा सघाउने बताएका थिए । 

तर, काठमाडौं फर्किने हवाई टिकट क्यान्सिल्ड गराएर बुटवल झरेका उनी त्यसयता सम्पर्कविहीन छन् । प्रहरीले उनको व्यापक खोजी गरिरहेको छ । 

यता, रायमाझीले संसद सचिवालयलाई पत्र लेखेर आफूलाई बिरामी बिदा मिलाइदिन आग्रह गरेको बताइएको छ । विना जानकारी लगातार १० वटा बैठकमा अनुपस्थित हुने सांसदलाई सभामुखले ठाडै निलम्बन गर्नसक्ने कानुनी व्यवस्था रहेकाले पद जोगाउन रायमाझीले अज्ञातस्थलबाट पत्र लेखेका हुन् ।