दुई छोरालाई विष खुवाएर आफूले पनि पिएकी महिला सिकिस्त, १८ महिने शिशु रहेनन्

मकवानपुरको हेटौंडामा एक महिलाले दुई छोरासहित आफूले विष पिएर आत्महत्याको प्रयास गरेकी छन् ।

प्रहरीका अनुसार बुधबार साँझ हेटौँडा उपमहानगरपालिका–१५ जाँतेकी ३६ वर्षीया सोनी पाख्रिनले ७ वर्षीय छोरा अस्किन र १८ महिने छोरा जेनिस वाइबालाई विष खुवाएर आफूले पनि विष सेवन गरेकी हुन् । 

झार मार्ने विषादी प्याराक्वाइट डाइक्लोराइड खाएका उनीहरुलाई हेटौडा अस्पताल हुँदै राति नै चितवन मेडिकल कलेज (सीएमसी)मा लगिएको थियो । तर, उपचारका क्रममा बिहीबार बिहान छोरा जेनिसको मृत्यु भएको मकवानपुर प्रहरीले जनाएको छ । 

साथै, आमा सोनी र अर्काे छोरा अस्किनको अवस्था गम्भीर छ । उनीहरूको आईसीयू कक्षमा उपचार भइरहेको छ । उनीहरुले विष सेवन गर्नुको कारण खुलिनसकेको र घटनाबारे अनुसन्धान भइरहेको प्रहरीको भनाइ छ ।