हिरासतमा रहेका मीनबहादुरहरुको मुद्दामा सर्वोच्चको कारण देखाउ आदेश

बालुवाटारस्थित ललिता निवास जग्गा प्रकरणमा पक्राउ परेकाहरुले दायर गरेको बन्दी प्रत्यक्षीकरणको रिटमा सर्वोच्च अदालतले कारण देखाऊ आदेश जारी गरेको छ । न्यायाधीश कुमार चुडालको एकल इजलासले मीनबहादुर गुरुङ, सुधीरकुमार शाह र धर्मप्रसाद गौतमले हालेको मुद्दामा उक्त आदेश गरेको हो । 

गुरुङ, शाह र गौतमले हदम्याद नाघेको मुद्दामा पक्राउ गर्नु अवैध रहेको जिकीर गर्दै हिरासतबाट मुक्त गर्न बन्दीप्रत्यक्षीकरणको मुद्दा दायर गरेका थिए । पक्राउ गर्नुको कारण र प्रमाणसहित २४ घण्टाभित्र महान्यायाधिवक्ताको कार्यालयमार्फत् लिखित जवाफ पेस गर्न गृह मन्त्रालयलाई अदालतले आदेश दिएको छ ।

आदेशमा भनिएको छ, ‘यसमा के कसो भएको हो ? निवेदकको मागबमोजिम बन्दी प्रत्यक्षीकरणको आदेश किन जारी हुनु नपर्ने हो ? आदेश जारी हुन नपर्ने मनासिब आधार, कारण र प्रमाण भए सोसमेत खुलाई यो सूचना म्याद प्राप्त भएको मितिले बाटाको म्याद बाहेक चौबीस घण्टाभित्र कागज प्रमाणहरुसहित महान्यायाधिवक्ताको कार्यालयमार्फत लिखित जवाफ पेस गर्नू भनी यो आदेश र निवेदन पत्रको प्रतिलिपीसमेत साथै राखी विपक्षीहरूको नाममा म्याद सूचना जारी गरी लिखित जवाफ परे वा अवधि व्यतित भएपछि नियमानुसार पेस गर्नू ।’