यात्रुलाई विमान नजिकैबाट फर्काएपछि अध्यागमन कर्मचारीमाथि अनेक आशंका

एक सयबढी नेपाली यात्रुलाई हिजो राति त्रिभुवन अन्तर्राष्ट्रिय विमानस्थलबाट मध्यरातमा फर्काइएपछि यतिबेला चर्को विवाद सिर्जना भएको छ । अध्यागमन विभागले नियतबश यात्रुहरुलाई फर्काएको भन्दै म्यानपावर व्यवसायीहरुले असन्तुष्टि जनाएका छन् । सलाम एयरबाट कुवेत जान लागेका १०१ यात्रुलाई गए राति र कुवेत एयरवेजबाट १६ यात्रुलाई आज बिहान विभागले विमानस्थलबाटै फर्काएको थियो । 

तीमध्ये ४० भन्दा बढी यात्रुलाई विमान चढ्नै लाग्दा फर्काइएपछि अनेक प्रश्न खडा भएको हो । उनीहरुको भीसा शंकास्पद रहेको आशंकामा राति साढे ९ बजे प्रस्थान कक्षको प्रतिक्षालयबाट अध्यागमनका कर्मचारीले राहदानी जफत गरेका थिए । ती सबै भौतिक निर्माण र घरेलु कामदारको रुपमा सिनामंगलस्थित युथ म्यानपावर प्रालि, निलकलम ह्युमन रिसोर्स प्रालि, ईन्डेक्स रिक्यु्रटमेन्ट प्रालिबाट त्यता जान लागेका थिए । 

कुल एक सय १७ जना नेपाली श्रमिक यात्रुमध्ये ८२ जनालाई राति अबेरसम्म अध्यागमन कार्यालयले रोकेको थियो । बाँकी १८ जनाको राहदानी नेपाल प्रहरीको मानव बेचबिखन ब्यूरोबाट खटिएको टोलीले जफत गरेको हो । बोर्डिङ पास लिइसकेका अन्यलाई पनि अध्यागमनले फिर्ता पठाएको बताइन्छ । 

जहाज चढ्न वेटिङ हलमा पुगिसकेकाको राहदानी जफत गरेपछि यतिबेला अध्यागमनका कर्मचारीको नियतमाथि गम्भीर प्रश्न खडा भएको बताइन्छ । विमानस्थल सबै दृष्टिकोणबाट निकै संवेदनशील क्षेत्र हो । त्यहाँ सुरक्षा व्यवस्थापनमा निकै कडाइ गरिएको हुन्छ । विदेश जाने यात्रुको विमानस्थल प्रवेशपछि सर्वप्रथम लगेज चेकिङ्ग गरिन्छ । 

त्यसपछि बोर्डिङ पास लिएर अध्यागमनमा जानुपर्छ । विभागले राहदानी, भिसालगायत सबै विवरण चेकजाँच गरिसकेपछि मात्रै अन्तिम सुरक्षा जाँचतर्फ पठाउँछ । यस्तोमा अध्यागमनबाट यति ठूलो भुल कसरी भयो त ? आफैंले सबै ठीक छ भनेर प्रतिक्षालयमा पठाएकाबाट राहदानी जफत गरेपछि अध्यागमनका कर्मचारीको नियतमाथि प्रश्न उठ्नु स्वाभाविकै हो । 

स्रोतले ‘सेटिङ्ग’ नमिलेपछि उनीहरुलाई अन्तिम क्षणमा फिर्ता पठाइएको दाबी गरेको छ । म्यानपावरसँग सहमतिअनुसारको ‘काम’ नभएपछि अध्यागमन कर्मचारीले उनीहरुलाई रोकेको दाबी गरिएको छ । तीनवटै म्यानपावर कम्पनीले यात्रु फर्काउनुको कारण थाहा नभएको बताएका छन् । अध्यागमनले कारणबिनै यात्रुलाई फर्काएको निलकमल म्यानपावरका निर्देशक बलराम भुर्तेलले जनआस्थासँगको कुराकानीमा बताए । 

उनका अनुसार निलकमलबाट २३ जना कुवेत जान लागेका थिए । उनीहरु सबै कानुनी प्रक्रिया पुर्याएरै जान लागेको निर्देशक भुर्तेलको ठोकुवा छ । ‘सबै जना प्रक्रिया पूरा गरेरै जान आँटेका हुन् । हामीले श्रम विभागबाट स्वीकृतिसमेत लिएका छौं । कुनै कारणबिना अध्यागमनले रोकेको हो’, उनले भने ।

तिलककुमार सारु निर्देशक भएका इन्डेक्स रिक्रुटमेण्टबाट ४६ जना कुवेत जान लागेका थिए । उनीहरुलाई पनि फर्काइएको छ । आफ्नो म्यानपावरका अधिकांशलाई जहाज चढ्न लाग्दा राहदानी जफत गरि फिर्ता पठाइएको उनीहरुको भनाइ छ । इन्डेक्सका कर्मचारीहरुका अनुसार यस विषयमा छलफल भइरहेको छ । 

सबै प्रक्रिया पुर्याएर हिँडेका यात्रुलाई अध्यागमनले रोकेपछि म्यानपावर व्यवसायीहरु आज गृह मन्त्रालय पुगेका छन् । विमानस्थलस्थित अध्यागमनका कर्मचारीहरुले बदनियत राखेर यात्रुहरुलाई फिर्ता पठाएको व्यवसायीहरुको आरोप छ । नेपाल वैदेशिक रोजगार व्यवसायी संघका महासचिव मेकलाल भुर्तेलले अध्यागमनले जानाजान उनीहरुलाई रोकेको बताए । 

सम्पूर्ण सेक्युरिटी जाँच गरेर प्रतिक्षालयमा पुगिसकेकालाई फिर्ता पठाइएकोमा उनले आपत्ति जनाएका हुन् । ‘श्रम विभागले संस्थागत रुपमा श्रम स्वीकृति दिएको छ । सबै चेकजाँच भएपछि फिर्ता पठाउनुले सरासर बदनियत देखिएको छ । हामीले गृह मन्त्रालय र श्रम मन्त्रालयमा कुरा राखिसकेको छौं । विभागले फिर्ता पठाएका सबैलाई क्षर्तिपूर्ति दिएर उनीहरुको गन्तव्यमा पुर्याउनुपर्छ’, उनले भने ।