अमृत साइन्स क्याम्पसमा तालाबन्दी

काठमाडौं महानगरपालिका वडा नम्बर–२६, लैनचौरस्थित अमृत साइन्स क्याम्पसमा तालाबन्दी गरिएको छ । कम्प्युटर साइन्स इन्फरमेसन टेक्नोलोजी (सीएसआईटी) को पाँचौं सेमेस्टरका विद्यार्थीले विभिन्न माग राख्दै आज क्याम्पसको प्रशासन र लेखा शाखामा तालाबन्दी गरेका हुन् । 

आंशिक शिक्षकहरुको आन्दोलनका कारण पठनपाठन हुन नसकेको र ल्याबमा गुणस्तरीय कम्प्युटरको अभावले गर्दा प्रयोगात्मक शिक्षा लिन कठिनाइ भएको उनीहरुको गुनासो छ । 

त्यस्तै, उनीहरुले सबै कम्प्युटरको नियमित मर्मत गर्नुको साथै निरीक्षण गर्न, सम्पूर्ण सीएसआईटीका कक्षा कोठामा प्रोजेक्ट बोर्ड वा डिजिटल बोर्डको व्यवस्था गरिदिन माग गरेका छन् । 

साथै, उनीहरुले आफ्नो माग पूरा नभएसम्म शाखामा लगाइएको ताला नखोल्ने चेतावनीसमेत दिएका छन् ।