बालुवाटार काण्डमा संलग्न सबै मारवाडी व्यापारी बेपत्ता

ललिता निवास जग्गा प्रकरणमा सिआइबीले अनुसन्धान कसिलो बनाउन थालेपछि भारतीय मूलका भएभरका आरोपित देशै छाडेर भागेका छन् । दलालसँग सेटिङ मिलाएर ललिता निवासको सरकारी जग्गा न्यून मूल्यमा किनेका ६ जनाको यसरी भागाभाग भएको हो । एमाले उपाध्यक्ष विष्णु पौडेलका छोरा र न्यायाधीश कुमार रेग्मीले जग्गा फिर्ता गरेर उन्मुक्ति पाएकै शैलीमा फुत्किने प्रयास असफल भएपछि उनीहरू देशै छोडेर हिँडेको प्रहरीको अनुसन्धानबाट खुलेको छ । यसरी भाग्नेहरूमा सन्दिप सारडा (एनआईसी एसिया बैंकको प्रमोटर र विदेशी मदिराको वितरक), मनोज केडिया (सिद्धार्थ बैंकका अध्यक्ष र श्रीराम मिल्कको साहुजी), श्रवण गोयल (सनराइज बैंकको प्रमोटर र हेभी इक्विपमेन्ट इम्पोर्टर), गोविन्द सांघाई (एनएलआइसी इन्स्योरेन्स र इलामको सोक्तिम चिया कम्पनीसँग सम्बद्ध), कैलाश गोयल (मारवाडी सेवा समितिका अध्यक्ष) र संगीता बोथरा छन् । जसमध्ये सन्दिप, मनोज र श्रवण भारत हुँदै दुबई पुगेका छन् भने अरु तीन जना अहिलेसम्म दिल्लीमै रहेको प्रहरीको नोटिसमा छ ।   

उनीहरू सबै सडकमार्ग हुँदै दिल्ली पुगेको बताइएको छ । त्यहाँबाट भीसा लगाएर दुबई पुगेकाहरू अहिले त्यतै छन् । नेपाली पासपोर्ट होल्डरहरूलाई दिल्लीबाट अर्को कुनै देश जानुपर्दा एनओसी (नो अब्जेक्सन सर्टिफिकेट) लेटर अनिवार्य छ । त्यहाँस्थित नेपाली दूतावासबाट यस्तो पत्र नलिई कुनै पनि नेपाली पासपोर्ट देखाएर अर्को देश जान पाउँदैन । अचम्मको कुरा, नेपालमा प्रहरीले समात्न ठीक परेको बेला भागेर दिल्ली पुगेका यिनीहरूलाई दूतावासले के आधारमा एनओसी दियो ? अनुसन्धान अधिकारीहरूसमेत चकित परेका छन् । काठमाडौँबाट सडक मार्ग हुँदै भारत छिरेर दिल्ली पुगेका गोविन्द, कैलाश र संगीता भने अहिलेसम्म त्यहीँ छन् । उनीहरू पनि त्यसैगरी दूतावासबाट एनओसी लिएर भाग्ने सम्भावना उच्च रहेको बताइन्छ । 

अर्कोतिर, फौजदारी अभियोगका एकजना अभियुक्त भने प्रहरी र अदालतमा सेटिङ मिलाएर एक–दुई दिनमा दिल्लीबाट नेपाल फर्किने तरखरमा रहेको चाल पाएपछि प्रहरी सतर्क भएको छ । गत वैशाख १९ गते चितवनको पोल्ट्री कारखाना ‘अनमोल फिड्स’का मालिक शंकर कँडेललाई कार्यालयमै ९ पेजको सुसाइड नोट लेखेर आत्महत्या गर्न बाध्य पारेको आरोप लागेपछि प्रदिप रुङ्गटा भागेर दिल्ली पुगेका थिए । उनी सेटिङमा नेपाल फर्किन लागेको प्रहरी स्रोतले बतायो । हिलटेक कम्पनीका मालिक कमल जैनले प्रहरी र अदालतमा कुरा मिलाइदिएर आत्महत्या दुरुत्साहन कसुरका आरोपितलाई नेपाल बोलाएको स्रोतको दाबी छ ।