टिकौलीमा भयङ्कर सवारी दुर्घटना, ८ वटा सवारी साधन एक-आपसमा ठोक्किँदा डेढ दर्जन घाइते
पूर्व–पश्चिम राजमार्गस्थित चितवनको टिकौली जङ्गलमा आठ वटा सवारी साधन एकापसमा जुधेका छन् ।
भरतपुर महानगरपालिका र रत्ननगर जोड्ने टिकौली जङ्गलमा आज बिहान सो दुर्घटना भएको हो । दुर्घटनामा १९ जना घाइते भएका छन् ।
भरतपुरबाट टाँडीतर्फ जाँदै गरेको ना. १ क ६१३१ नम्बरको अक्सफोर्ड कलेजको बसले विपरीत दिशाबाट आउँदै गरेको ना.२ च ८४४६ नम्बरको बोलेरोलाई ठक्कर दिएको र सोही क्रममा अन्य ६ वटा मोटरसाइकल र स्कुटर बससँग ठोक्किएको प्रहरीले जनाएको छ ।
जिल्ला प्रहरी कार्यालय, चितवनका अनुसार बा.प्र.०६–००१प ९९८१, बा.प्र.०३–००५प ९७, ना.६२ प ६०३२, बा.प्र.०३–००१प ४१४७ नम्बरका मोटरसाइकल र बा.प्र.०६–००१प २२९४ र ब.प्र.०३–००२प ४१९८ नम्बरको स्कुटरलाई पनि ठक्कर दिएको हो ।
घाइतेहरुको विभिन्न अस्पतालमा उपचार भइरहेको प्रहरी नायव उपरीक्षक (डिएसपी) विजयराज पण्डितले बताए । उपचारका लागि घाइतेहरुलाई भरतपुर अस्पताल, पुरानो मेडिकल कलेजलगायतका अस्पताल पठाइएको उनले जानकारी दिए ।
टिप्पणीहरू