डेंगु रोक्न ‘वायो लार्भिसिद’ औषधी छर्दै काठमाडौं महानगर
काठमाडौं महानगरपालिकाले महानगर क्षेत्रभित्र डेंगु रोग फैलिन नदिन नेपालमै पहिलो पटक ‘वायो लार्भिसिद’ नामक जैविक औषधीको प्रयोग गर्ने भएको छ ।
लामखुट्टेको लार्भा नष्ट गर्नका लागि उक्त औषधीको प्रयोग गर्न लागेको महानगरपालिकाका मेयर बालेन्द्र शाह (बालेन) ले जानकारी गराए । उनका अनुसार यो औषधीले लामखुट्टे र त्यसका लार्भाबाहेक कसैलाई पनि हानी गर्दैन । औषधीलाई पानीको माथिल्लो भागमा छर्कनुपर्दछ ।
यसले लार्भाको पेटमा विष उत्पन्न गर्ने र उसको पाचन प्रक्रिया नष्ट गर्नुका साथै पूर्ण विकसित हुन नपाउँदै लार्भा मर्ने उनले बताए । मेयर शाहले सो औषधीले डेंगुसहित फिलारिया, औलो (मलेरिया), चिकन्नीयाजस्ता रोग फैलाउने सबै प्रजातिका लामखुट्टेको लार्भा र प्युपा नष्ट गर्ने पनि जनाएका छन् ।
महानगरपालिकाले डेंगु रोगको बारेमा परामर्श दिन निःशुल्क हटलाइन टेलिफोन (११८०) सेवा समेत २४ सै घण्टा सञ्चालन गर्दै आइरहेको छ । त्यस्तै, अस्पताल जानु परेमा (१०२) सम्पर्क गरी निःशुल्क एम्बुलेन्स प्रयोग गर्न सक्ने व्यवस्था मिलाइएको छ ।
योसँगै स्वास्थ्य प्रवद्र्धन केन्द्रहरुमा डेंगु रोगको उपचारका लागि चाहिने सिटामोल, जीवन जललगायत आवश्यक औषधीको वितरणको व्यवस्था मिलाइएको महानगरले जनाएको छ ।
ट्रेन्डिङ पोस्ट
टिप्पणीहरू