केपीले आफूलाई राष्ट्रपतिमा प्रस्ताव नगरेको माधव नेपालकाे खुलासा

नेकपा एकीकृत समाजवादीका अध्यक्ष माधवकुमार नेपालले एमाले अध्यक्ष केपी शर्मा ओलीले आफूलाई राष्ट्रपतिमा प्रस्ताव नगरेको बताउनुभएको छ । उहाँले गत राष्ट्रपति निर्वाचनताका नेकपा ब्युँताउने विषयमा भेट भएको प्रसंग कोट्याउँदै उक्त जानकारी दिनुभएको हो ।

त्यस समयमा ओलीले मलाई राष्ट्रपतिको प्रस्ताव नगरेको तर पछि माधवलाई राष्ट्रपतिमा प्रस्ताव गरेको भन्दै गतल प्रचार गरिएको उल्लेख गर्दै भन्नुभयो, ‘प्रस्ताव राखेर पनि म मान्ने थिएँ वा मान्दिनँ थिएँ । त्यो आफ्नो ठाउँमा छ । तर प्रस्ताव नै राखेको होइन ।’ भर्खरै आफ्नो अध्यक्षतामा खुलेको नयाँ पार्टी र कार्यकर्तालाई अलपत्र पारेर आफू राष्ट्रपति बन्ने मनस्थितिमा त्यतिबेला नरहेको पनि उहाँको भनाई छ ।

नेकपा एकीकृत समाजवादी निकट अनेरास्ववियुको स्थायी कमिटी बैठकलाई सम्बोधन गर्दै उहाँले उक्त धारणा राख्नुभएको हो । त्यसैगरी हालैको सुन काण्डको छानबिन गर्न बनाउने भनिएको उच्चस्तरीय समिति र भएको छलफलमा आफ्नो दललाई संलग्न नगराएकामा पनि उहाँले आपत्ति जनाउनुभएको छ ।

छानबिनमा राष्ट्रिय मान्यताप्राप्त दलको नाममा छ दल बसेकाले आफूहरुले यसलाई निकै गम्भीरताका साथ लिएको उहाँले बताउनुभयो ।