सर्वोच्च अदालतका न्यायाधीशहरूलाई ‘अपराधी’ को संज्ञा, महाअभियोग लगाउन माग

न्यायाधीशहरूलाई ‘अपराधी’को संज्ञा दिँदै एक सांसदले उनीहरुमाथि महाअभियोग लगाउन माग गरेका छन् । 

आज बसेको प्रतिनिधिसभा बैठकमा एकीकृत समाजवादीका सांसद अमरबहादुर थापाले सांसद विकास कोषको रकममाथि अंकुश लगाउने गरि अन्तरिम आदेश दिने न्यायाधीशहरूलाई ‘अपराधी’ को संज्ञा दिँदै महाअभियोग लगाउनुपर्ने माग गरेका हुन् । उनले अदालतको सो आदेश शक्ति पृथकीकरणको सिद्धान्त प्रतिकूल रहनुका साथै सार्वभौम संसदले पास गरेको अर्थ विधेयकलाई चुनौती दिइएको बताए । 

थापाले भने, ‘शक्ति पृथकीकरणको सिद्धान्तलाई लापरवाही गरेर आफू खुसी गर्ने अदालतका न्यायधीशहरू कि यो बजेट पनि सर्वोच्चले बनाओस् हामी संसद्ले बनाउनु पर्दैन । यो बजेट र सबै शक्ति सबै अदालतले लिनसक्ने संविधान संशोधन गर्नुपर्‍यो । होइन भने शक्ति पृथकीकरण विधायिकामाथि हस्तक्षेप यस्ता प्रविधिका काम गर्नेहरूमाथि कडाभन्दा कडा कारबाही गर्नुपर्छ । कडा कारबाही भनेकै महाअभियोग हो । महाअभियोग लागनुपर्छ अपराधीलाई ।'