परमादेशी मुख्यमन्त्रीद्वारा शपथ, चार सदस्यीय क्याबिनेट गठन

सर्वोच्च अदालतको परमादेशले दोस्रोपटक कोशी प्रदेशको मुख्यमन्त्री नियुक्त भएका हिक्मतकुमार कार्कीले पद तथा गोपनीयताको शपथ लिएका छन् । 

नेकपा एमाले प्रदेश सभामा संसदीय दलका नेतासमेत रहेका नवनियुक्त मुख्यमन्त्री कार्कीलाई आज साँझ प्रदेश प्रमुख पर्शुराम खापुङले शपथ गराएका हुन् । मुख्यमन्त्रीको शपथ लिएलगत्तै कार्कीले आजै सानो आकारको मन्त्रिपरिषद् पनि गठन गरेका छन् ।

प्रदेश सभाको सबैभन्दा ठूलो दलको नेताको हैसियतमा संविधानको धारा १६८ (३) बमोजिम मुख्यमन्त्री भएका उनले आफ्नै पार्टी एमालेबाट तिलकुमार मेन्याङ्वो, पाँचकर्ण राई र एकराज कार्कीलाई मन्त्री नियुक्त गरेका हुन् । कार्कीलगत्तै शपथ लिएका उनीहरुलाई क्रमशः ऊर्जा, वन र भौतिक पूर्वाधार मन्त्रालयको जिम्मेवारी तोकिएको छ ।   

त्यस्तै, सृजना राई सामाजिक विकास राज्यमन्त्री नियुक्त भएकी छन् । निवर्तमान मुख्यमन्त्री उद्धव थापाले प्राप्त गरेको विश्वासको मत अवैधानिक ठहर गर्दै सर्वोच्च अदालतले हिजो ४८ घण्टाको समय तोकेर कार्कीलाई मुख्यमन्त्री नियुक्त गर्न परमादेश जारी गरेको थियो । संविधानको धारा १६८ (३) बमोजिम मुख्यमन्त्री भएका उनले एक महिनाभित्र विश्वासको मत लिनुपर्ने हुन्छ ।