केदारलाई गरेको हस्ताक्षर फिर्ता लिन कांग्रेसको निर्देशन
नेपाली कांग्रेस कोशी प्रदेश कार्यसम्पादन समिति बैठकले केदार कार्कीलाई मुख्यमन्त्रीमा समर्थन गर्ने सांसदहरुलाई हस्ताक्षर फिर्ता लिन निर्देशन दिएको छ ।
बैठकले कार्कीलाई मुख्यमन्त्रीमा समर्थन गर्ने ८ सांसदलाई हस्ताक्षर फिर्ता लिन र पार्टीको संस्थागत निर्णयअनुसार चल्न निर्देशन दिएको हो ।
प्रदेश महामन्त्री उमेश थापाका अनुसार बैठकले पार्टीलाई एकतावद्द बनाउन गठबन्धनले गरेको निर्णय कार्यान्वयन गर्ने निर्णय पनि गरेको छ । त्यस्तै, केन्द्रले थप केही निर्देशन दिए त्यससम्बन्धमा थप निर्णय गर्ने अधिकार प्रदेश पदाधिकारीलाई दिने निर्णय गरेको उनले बताए ।
कोशी सरकारको भावी नेतृत्वका लागि नेकपा एमालेको समर्थनमा कांग्रेसको शेखर कोइराला गुटका कार्की र सत्तारुढ गठबन्धनबाट माओवादी केन्द्रका इन्द्रबहादुर आङबोले दावी प्रस्तुत गरेका छन् ।
आङ्बोले गठबन्धनमा रहेका दलहरु नेपाली कांग्रेसका २९, माओवादीका १३, नेकपा एकीकृत समाजवादीका चार र जसपाका एक सांसदको समर्थन रहको निवेदन बुझाएका छन् । कांग्रेसका बिद्रोही उम्मेदवार कार्कीले आफूसहित कांग्रेसका ८ जना र एमालेका ३९ सांसदको हस्ताक्षरसहित मुख्यमन्त्रीको दाबी गरेका छन् ।
दुबै पक्षबाट ४७-४७ सांसदको हस्ताक्षरसहितको दावी परेपछि प्रदेश प्रमुख परशुराम खापुङले निर्णय गरिसकेका छैनन् ।
टिप्पणीहरू