काँग्रेसको चियापान शुरु, निम्तालु आउन थाले
दशैं, तिहार, नेपाल संवत्, छठ पर्वका अवसर पारेर नेपाली कांग्रेसले आयोजना गरेको शुभकामना आदानप्रदान तथा चियापान समारोह शुरु भएको छ । ललितपुरको सानेपास्थित पार्टी केन्द्रीय कार्यालय केही बेरअघि चियापान कार्यक्रम शुरु भएको हो ।
पार्टी सभापति शेरबहादुर देउवालगायत पदाधिकारी र केन्द्रीय सदस्यले अहिले आगन्तुक पाहुनालाई समारोहमा स्वागत गरिरहेका छन् । कार्यक्रम अपराह्न ५ बजेसम्म सञ्चालन हुनेछ ।
चियापान समारोहमा झण्डै १० हजार जनालाई आमन्त्रण गरिएको काँग्रेसले बताएको छ । काँग्रेसका अनुसार विभिन्न राजनीतिक दलका नेता, मन्त्रीगण, संवैधानिक निकायका प्रमुख, सांसद, राष्ट्रसेवक कर्मचारी, सुरक्षा निकायका प्रमुख, काठमाडौंस्थित कूटनीतिक नियोगका प्रमुखलगायतलाई निमन्त्रणा गरिएको छ ।
पार्टीका संस्थापक तथा तत्कालीन सभापति बीपी कोइरालाले २०३३ सालदेखि कोजाग्रत पूर्णिमाको दिनमा चियापान आयोजना गरेका थिए । विसं २०३८ सम्म बिपीले यसलाई निरन्तरता दिएका थिए ।
त्यसपछिका सभापति कृष्णप्रसाद भट्टराई, गिरिजाप्रसाद कोइराला, सुशील कोइराला हुँदै अहिले शेरबहादुर देउवाले पनि चियापान कार्यक्रमलाई निरन्तरता दिएका हुन् ।
टिप्पणीहरू