दुर्गा प्रसाईंलाई देखाउँदै राजेन्द्र लिङ्देनले भने ‘मौलिक हक खोसियो’

व्यवस्था परिवर्तन नभएसम्म सडक नछाड्ने घोषणा गरेका राजावादी अभियन्ता दुर्गा प्रसाईंलाई घरभित्रै राखेपछि राष्ट्रिय प्रजातन्त्र पार्टी (राप्रपा) ले विरोध जनाएको छ । 

राप्रपा अध्यक्ष राजेन्द्र लिङ्देनले काठमाडौंमा भइरहेको धरपकड र नजरबन्दका घटनाहरु अलोकतान्त्रिक र जनताको मौलिक हकविरुद्ध भएको बताएका हुन् । सामाजिक सञ्जालमा लेख्दै उनले शान्तिपूर्ण ढंगले हिँडडुल गर्ने, भेला हुने र विरोध प्रदर्शन गर्ने जनताको मौलिक अधिकार सरकारले खोसेको आरोप लगाएका छन् । 

लेखेका छन, ‘शान्तिपूर्ण ढंगले हिँडडुल गर्न, भेला हुन र विरोध प्रदर्शन गर्न पाउने जनताको मौलिक हकविपरीत आज काठमाडौंमा भइरहेको धरपकड र नजरबन्दजस्ता घटनाहरु अलोकतान्त्रिक तथा जनताको मौलिक हकविरुद्धका काम हुन् । धरपकड र कुनैपनि प्रकारको दमनले समस्याको समाधान निस्कँदैन ।’

त्यस्तै, उनले सरकारलाई तत्काल सच्चिन सुझाव दिएका छन् । राजतन्त्रको नाममा ऋण मिनाहा गराउने अभियानमा रहेका विवादास्पद मेडिकल व्यवसायी प्रसाईंको भक्तपुरको मध्यपुर थिमी नगरपालिका–६, कमेरोटारस्थित निवास प्रहरीले घेरेर राखेको बताइन्छ ।

हिजो काठमाडौंको बल्खुमा अराजक देखिएका आन्दोलनकारी आज थप आक्रामक हुने संकेत पाएपछि प्रहरीले प्रसाईंलाई बाहिर निस्कन नदिने रणनीति अपनाएको बुझिएको छ ।