मध्यपहाडी लोकमार्ग हुँदै पश्चिम लाग्यो एमालेको जम्बो टोली

मध्यपहाडी लोकमार्ग पदयात्रामा सहभागी हुन नेकपा एमालेका नेताहरु बैतडीतर्फ प्रस्थान गरेका छन् । सुदूरपश्चिम प्रदेशको बैतडीको झुलाघाटबाट शुरु हुने पदयात्रामा सहभागी हुन एमालेका दुई दर्जन नेता त्यता गएका हुन् । 

श्री एयरको नियमित उडानमा काठमाडौंबाट धनगढीको गेटा विमानस्थल पुगेका एमालेका सचिव एवं पूर्वमन्त्री योगेश भट्टराई र राष्ट्रिय युवासंघका अध्यक्ष क्षितिज थेबे बीएबी ०४६९ र ग २ च १३७१ नम्बरको गाडीमा बैतडीतिर लागेका छन् । 

त्यस्तै,महासचिव शंकर पोखरेल,उपाध्यक्ष रामबहादुर थापा (बादल),नेताहरु रघुवीर महासेठ,पृथ्वीसुब्बा गुरुङ्ग,पद्मा अर्याल, सुरेन्द्र पाण्डे,पार्वत गुरुङ्ग,भानुभक्त ढकाल, गोकर्ण विष्ट,विष्णु रिमाल,राजन भट्टराई, सुजिता शाक्य,बिन्दा पाण्डेलगायत १५ जनाको टोली पनि त्यता गएको छ  । 

उनीहरु बुद्ध एयरको नियमित उडानबाट गेटा विमानस्थल पुगेका थिए । प्रदेश ३ ०१०२३ च ६२६२ नम्बरको गाडीमा उनीहरु त्यता गएको बताइएको छ । एमालेले भोलिदेखि मध्यपहाडी लोकमार्ग केन्द्रित अभियान आरम्भ गर्दैछ । अभियानको उद्घाटन एमाले अध्यक्ष केपी शर्मा ओलीले गर्नुहुनेछ ।