फोटोमा बियरको बोतल, प्रहरी कार्यालयमा धेरैबेर छलफल

जिल्ला प्रहरी कार्यालय चितवनको एसपी कक्षमा अघिल्लो बुधबार दिउँसो दुई दर्जनभन्दा बढी मानिस जम्मा भएका थिए । छलफल पनि एक घन्टाभन्दा बढी समयसम्म चल्यो । छलफलको विषय सामान्य पनि थिएन । जिल्लाकी प्रभावशाली महिला नेतृ र पपुलर सञ्चारकर्मी जोडिएको साइबर क्राइम सम्बन्धी केस थियो ।

प्रधानमन्त्रीकी छोरी तथा भरतपुर महानगरपालिका प्रमुख रेनु दाहाल र सञ्चारकर्मी सन्तोष देउजा टेलबमा बसेर बोतलका बोतल बियर सिनित्त पार्दै गफिँदै एकापसमा गज्जबकै अफेयर चलेजस्तो देखिने नक्कली फोटोमा केही लेखेर फेसबुकमा पोष्टाइएकोे थियो । रेनु र सन्तोषको बदनाम गराउने, चरित्र हत्या गर्ने उद्देश्यले इडिट गरी बनाइएको फोटोलाई केही दिनअघि राष्ट्रिय स्वतन्त्र पार्टीका कार्यकर्ताले गाली थपेर फेसबुकमा हाल्ने र शेयर गर्ने काम गरेका थिए । पोष्ट गर्ने रत्ननगर नगरपालिका निवासी शिव शर्मा र त्यसलाई शेयर गर्ने भरतपुरका उपेन्द्र देवकोटालाई प्रहरीले गिरफ्तार गरेको थियो । 

सोही सम्बन्धमा राष्ट्रिय स्वतन्त्र पार्टीका नेता, कार्यकर्ता तथा पत्रकारहरु एसपी कक्षमा जम्मा भएका थिए । गल्ती गर्ने श्रीमान्, उनीहरुका श्रीमतीहरुले हात जोड्दै रुनुपरेको थियो । धन्न देउजा उदार भइदिए । नत्र साइबर अपराधमा दुबैजना जेल जान्थे । फोटो इडिट गरी जोडेर बनाएको प्रस्ट छ । शिव शर्मा भन्दै थिए, ‘नजानेर लेखियो सन्तोषजी ¤ आई एम सरी ।’ आफूले पूरै पढ्दै नपढी शेयर गरेको उपेन्द्रको भनाइ थियो ।
 
‘फौजदारी न्यायको सिद्धान्त अनुसार कानुनको अनभिज्ञता देखाएर, मलाई थाहा छैन भनेर सुख पाउने अवस्था छैन । कानुनले क्षमा दिँदैन ।’ एसपी रामेश्वर कार्कीले प्रस्टै भनिदिए । उजुरी दर्ता गरेर मुद्दामै लाने कि, के गर्ने ? निर्णय देउजामै निहित थियो । उनैको ठाडो उजुरीले ती पक्राउ परेका थिए । पत्रकार महासंघ चितवनका अध्यक्ष नारायण अधिकारीले पनि भने, ‘के गर्ने ? भन्ने सन्तोष भाइकै डिसिजन हुन्छ, हामी त रोहबरमात्र हो ।’ 

शिवलाई नचिनेपनि उनकी श्रीमतीको आँसुमा सन्तोष कठोर हुन सकेनन् । देवकोटा त झन् देउजाको १४ वर्षदेखिको चिनजान रहेछन् । उनकी श्रीमती एक पटकलाई माफी दिनुस् भन्दै पटकपटक हात जोडेर रोइकराइ गर्दै थिइन् । सञ्चारकर्ममार्फत् आफैं पीडित महिलाहरुको आँसु पुछ्ने काम गर्दै आएका देउजाले ‘म तपाईंहरुमाथि पनि निर्मम हुन सक्दिनँ’ भन्दै महिलाहरुलाई भने, ‘तपाईंहरुको मुख हेरेर छोडिदिन्छु ।’ देवकोटामाथि देउजा थपिए, ‘तपाईं, तपाईं त झन् १४ वर्षदेखिको साथी । तपाईंलाई थुनाएर मलाई बहादुरी देखाउनु छैन ।’ 

सन्तोषले छोडिदिने भनेपछि राष्ट्रिय स्वतन्त्र पार्टीको प्रदेशस्तरीय नेता भविलाल चापागाईंको पनि आँखा कृतज्ञका आँसुले भरिएका थिए । मानवता देखाउँदै सहज भइदिएकोमा उनले सन्तोषप्रति आभारका शब्द पनि पोखे । रास्वपा नेतृ प्रभा ढकाल भने ‘पार्टीको रोहबरमा छुटाउने कुरा हुँदैन’ भन्न थालिन् । देउजाले ‘एक पटकलाई छोडिदिन्छु’ भन्दै पार्टीले उनीहरुको जिम्मा लिनुपर्ने बताएका थिए । त्यसपछि प्रभाको भनाइ आयो, ‘तपाईंहरु कारबाही गर्नुस् या छाड्नुस् । अब हाम्रो पार्टीले पनि उहाँहरुलाई कारबाही गर्छ, हामीले लेखेर केन्द्रमा पठाइसकेका छौं । रविजीले २४ घन्टाभित्र कारबाही गर्छु भन्नुभाको छ । हामी त्योभन्दा पहिले नै गर्छौं ।’ प्रभाको पछिल्लो अभिव्यक्ति सुनेर केही पत्रकारहरुले उनले बोली फेरेको आरोप लगाए ।

पत्रकार महासंघका अध्यक्षले ‘पार्टीले कारबाहीका लागि सिफारिस गरेको पत्रको प्रतिलिपि देखाउनुस् त ¤’ भन्दा प्रभाले भनिन्, ‘यो हाम्रो पार्टीको आन्तरिक कुरा हो, मिल्दैन ।’ पार्टी प्रतिनिधि नभई स्थानीयको रुपमा रोहबर बस्न उनी तयार भइन् । पार्टीको तर्फबाट कारबाही गरेको विज्ञप्ति निकाल्ने कुरामा पनि उनले सहमति जनाइन् । अन्ततः शिव र उपेन्द्र दुवैलाई एक पटकको निम्ति सार्वजनिक रुपमा माफी मगाएर छाड्ने निर्णय भयो । उक्त फोटो इडिट गरी बनाएर सुरुमा पोष्ट गर्नेलाई प्रहरीले यसअघि नै पक्रेर कारबाही चलाइसकेको बुझिन्छ । तीचाहिँ अदालतबाट धरौटीमा रिहा भएका थिए ।