झुलाघाटबाट हिँडेको एमाले टोली शनिबार बागमती छिर्ने

नेकपा एमालेको बैतडीको झुलाघाटदेखि पाँचथरको चिवा भञ्ज्याङसम्मको ‘समृद्धिका लागि संकल्पयात्रा’ आगामी बुधबारदेखि गण्डकी प्रदेशमा आइपुग्ने कार्यक्रम छ । सुदूरपश्चिम र कर्णाली प्रदेश हुँदै मध्यपहाडी लोकमार्गमा केन्द्रित कार्यक्रम सातौं दिन गण्डकी प्रदेशमा आइपुग्ने बताइएको छ ।

एमाले गण्डकी प्रदेशले बागलुङको सीमाना पातीहाल्ने देखिको समय तालिका सार्वजनिक गरेको छ । जसअनुसार मंसिर २० गते बिहान साढे ८ बजे पातीहाल्नेमा संकल्पयात्रामा सहभागी नेताहरुको स्वागत हुनेछ । साढे ९ बजे झावीखोलामा भेटघाट, १० देखि साढे ११ बजेसम्म बिहानको खाना र भेटघाट राखिएको छ । 

सोही दिन दिउँसो साढे १२ देखि पौने १ बजेसम्म बडिगाड गाउँपालिकामा स्वागत, साढे १ देखि ३ बजेसम्म वामी टक्सारमा सभा, साढे ४ बजे गल्कोटमा स्वागत, भेटघाट र बेलुकाको खानाको प्रबन्ध गरिएको हो । 

भोलिपल्ट बिहान ८ बजे टोली बागलुङ बजारतर्फ प्रस्थान गर्ने छ । ९ बजे काठेखोलामा स्वागत र १० बजे बागलुङ बजारमा स्वागत कार्यक्रम राखिएको प्रदेश समितिले तयार पारेको कार्यसूचीमा उल्लेख छ । बिहान ११ देखि साढे १२ बजेसम्म बागलुङ बजारमा खाना र भेटघाट, १ बजे कालिका मन्दिर अवलोकन र सवा १ बजे मालढुंगाबाट अघि बढ्ने छ ।

सोही दिन पर्वतको कुश्मामा एमालेले जनसभा र भेटघाट राखेको छ । दिउँसो ३ बजे टोली कास्कीको नयाँपुल पुग्नेछ । ३ बजेर ४० मीनेटमा उनीहरुलाई अन्नपूर्ण गाउँपालिकाको नागडाँडामा स्वागत गरिनेछ । साढे ४ बजे हेम्जामा भेटघाट, पोखरामा खाना र बास तय गरिएको छ । 

मंसिर २२ गते बिहान साढे ७ बजे जिरो किमी पोखराबाट प्रस्थान, बिहान ८ बजे अमरसिंह चोकमा स्वागत, ९ बजे तालचोकमा स्वागत, साढे ९ बजे रुपा गाउँपालिकामा भेटघाट र सवा १० बजे कास्कीबाट बिदाइ हुनेछन् ।

मंसिर २२ गते नै टोली लमजुङ आइपुग्ने बताइएको छ । बिहान साढे १० बजे रामबजार चोकमा स्वागतपछि करपुटार महादेव मन्दिरको भ्रमण गर्ने कार्यक्रम छ । ११ बजे भोर्लेटार बजारमा स्वागत, साढे ११ बजे सुन्दरबजार नगरपालिका वडा नम्बर ३ मा खाना, १ बजे खत्रीठाँटी बजारमा सभा, सवा २ बजे सुन्दरबजारबाट राइनास प्रस्थान गर्ने टोलीलाई धमिलिकुमा स्वागत र साढे ३ बजे टोली लमजुङबाट गोरखा जानेछ । 

उक्त दिन टोली गोरखामा बास बस्न पुग्नेछ । मंसिर २३ गते बिहान साढे ७ बजे भेटघाट, सवा ९ बजे भीमसेन गाउँपालिकामा स्वागत, साढे १० बजे गण्डकी प्रदेशबाट बिदाई भएर बागमती प्रदेश प्रवेश गर्ने कार्यक्रम बनाइएको छ । 

बागमतीका विभिन्न जिल्ला हुँदै टोली कोशी प्रदेशतर्फ लाग्ने छ । पाँचथरको चिवा भञ्ज्याङमा पुस २ गते अभियानको औपचारिक समापन गरिने एमालेको पूर्व निर्धारित कार्यक्रम छ ।