अवैध नदीजन्य पदार्थ बोक्न ठिक्क परेका दर्जनौं गाडी बगरमा

कास्कीमा अवैध रुपमा नदीजन्य पदार्थ उत्खनन्मा प्रयोग भएका साढे चार दर्जन सवारीसाधनलाई प्रहरीले नियन्त्रणमा लिएको छ । 

जिल्ला प्रहरी कार्यालय कास्कीबाट खटिएको टोलीले अवैध रुपमा प्राकृतिक  स्रोतको दोहनमा संलग्न ५६ वटा सवारीसाधन (ट्रक, ट्रिपर र ट्रयाक्टर) लाई नियन्त्रणमा लिएको जनाइएको छ । 

ती सवारीसाधनले कास्कीका विभिन्न स्थानमा नदीजन्य पदार्थ उत्खनन् गरी फर्जी बिल समेत बनाई चोरी निकासी गरेको प्रहरीको आरोप छ । 

प्रहरीका अनुसार भ्याटबिल, कागजपत्र नभएका ती सवारीसाधनले नक्कली कागजपत्रको आधारमा नदीजन्य पदार्थ ढुंगा, गिट्टी, बालुवा ओसारपसार गर्ने गरेको यथार्थ खुलेको छ । 

नियन्त्रणमा लिइएका सबै सवारीसाधनलाई आवश्यक कारबाहीको निम्ति पोखरा महानगरपालिकामा बुझाइएको छ ।