मन्त्री फेर्न प्रधानमन्त्रीलाई मुश्किल

सत्तारुढ गठबन्धन दलको बैठकमा पटक पटक मुलुकको अर्थतन्त्रले सकारात्मक गति नलिएको भन्दै चिन्ता व्यक्त गरिए पनि सुधारतर्फ भने कोही अग्रसर भएका छैनन् । स्रोतका अनुसार कांग्रेस सभापति शेरबहादुर देउवा र आरजु राणाले प्रकाशशरण महतको नराम्रो कुरा सुन्नै नचाहेपछि गठबन्धनमा अर्थमन्त्री फेर्ने चर्चा फासफुस हुने गरेको छ ।

सत्तारुढ गठबन्धनको बैठकमा पटक पटक अर्थमन्त्रीको कार्यशैलीवारे आलोचना हुने गरेको र उनले ढंग नपुर्‍याएकाले परिवर्तन गर्नु पर्ने कुरा उठ्ने गरेको छ । देउवा यस विषयमा टसमस नभएपछि प्रधानमन्त्री पुष्पकमल दाहाल प्रचण्डको प्रयास पनि पानीको फोका हुन पुगेको हो । 

गत वर्षको तुलनामा चालु आर्थिक वर्ष अर्थतन्त्रका सबै सूचक नकारात्मक देखिँदै छ भने पर्यटन क्षेत्रमा मात्रै केही सुधारको आशा हुने आँकडा देखिएको छ । चालु वर्ष संख्यात्मक रूपमा गत वर्षभन्दा एक–डेढ लाख बढी पर्यटक भित्रिएको अवस्था छ । उत्पादन र उत्पादकत्व, निर्यात, आयातलगायत अन्य क्षेत्रमा भने अवस्था झनै खच्किएको छ ।

कर्मचारीलाई तलब दिनको लागि ऋण लिनुपर्ने अवस्था छ । विकासभन्दा साधारण खर्चतर्फ बजेट बढ्दो छ । वैदेशिक ऋण वृद्धि भई ६ अरब डलर पुगेको अवस्था छ । मुलुकबाट पु“जी पलायन भएको छ । तर अर्थमन्त्री महतले अर्थतन्त्र सुधार निम्ति प्रभावकारी कुनै  कार्यक्रम गर्न सकेका छैनन् ।

यसैगरी प्रधानमन्त्री पुष्पकमल दाहाल प्रचण्डले बरु गृह मन्त्रालय लैजाऊ, अर्थतन्त्र सुधारका लागि केही कार्यक्रम पनि बनाउन नसक्ने व्यक्तिलाई परिवर्तन गर भन्न नसकेको दाबी स्रोतले गरेको छ । अर्कोतर्फ राष्ट्रिय स्वतन्त्र पार्टीका अध्यक्ष रवि लामिछाने पनि सरकारमा जाने कसरतमा उत्रिएका छन् ।

लामिछानेले प्रधानमन्त्री दाहालसमक्ष आफुलाई पुनः गृह मन्त्रालयको जिम्मेवारी दिए सरकारमा सामेल हुने खबर तारन्तार पठाएका छन् । तर रास्वपा र उनको पुनः गृहमन्त्री हुने रहरलाई सत्तारुढ गठबन्धनमा रहेका अन्य दलहरूले खासै चासो दिएका छैनन् ।