करोडौं राजस्व हिनामिना गर्ने मालपोतका हाकिमले सफाई पाएपछि सर्वोच्चमा पुनरावेदन

अख्तियार दुरुपयोग अनुसन्धान आयोगले विशेष अदालतबाट फैसला भएको अर्को यौटा मुद्दामाथि सर्वोच्च अदालतमा पुनरावेदन गरेको छ । 

राजस्व हिनामिना गरी भ्रष्टाचार गरेको सम्बन्धी एक मुद्दामा विशेष अदालतबाट भएको फैसलामा चित्त नबुझेपछि सर्वोच्चमा पुनरावेदन गरेको आयोगका प्रवक्ता नरहरि घिमिरेले जानकारी दिए । 

राजस्व हिनामिना गरी भ्रष्टाचार गरेको आरोपमा मालपोत कार्यालय बाराका तत्कालिन कार्यालय प्रमुख मदनप्रसाद गुप्तासहित तीन जनाविरुद्ध आयोगले मुद्दा दायर गरेको थियो । उनीहरुले आर्थिक वर्ष २०७५–०७६ को फागुल्न १२ गतेसम्म संकलित राजस्व रकममध्ये चार करोड ५८ लाख ७१ हजार २० रुपैयाँ हिनामिना गरेको अख्तियारको अनुसन्धानबाट खुलेको थियो । 

तर, विशेष अदालतको गत असार १७ गतेको फैसलाले उनीहरुलाई सफाई दिएपछि त्यसप्रति असन्तृष्टि जनाउँदै अख्तियार सर्वोच्च पुगेको हो । अख्तियारले हिजो पनि विशेषले गरेको दुई वटा फैसलाविरुद्ध सर्वोच्चमा पुनरावेदन दिएको थियो ।