विदेशको आश देखाएर ठगी गर्ने क्रम रोकिएन

वैदेशिक रोजगारीमा विभिन्न मुलुक पठाइदिने नाममा ठगी धन्दा चलाउनेहरु धमाधम प्रहरीको फन्दामा परिरहेका बेला थप तीन जना समातिएका छन् । 

आकर्षक तलबको प्रलोभनमा सर्वसाधारण ठग्ने पुजा श्रेष्ठ, विन्दालाल साह कानु, विकासकुमार घले र संजय लामालाई प्रहरीले पक्राउ गरेको हो । प्रहरीको काठमाडौं उपत्यका अपराध अनुसन्धान कार्यालयबाट खटिएको प्रहरी टोलीले उनीहरुलाई हिजो नियन्त्रणमा लिएको जनाएको छ । 

काठमाडौंको तार्केश्वर नगरपालिका–८ जंरखु बस्ने दोलखाकी ३० वर्षीया पुजाले वैदेशिक रोजगारीमा पोल्याण्ड पठाइदिने र त्यहाँ पुगेपछि प्रतिष्ठित होटलमा काम लगाइदिने प्रलोभनमा ठगेको खुल्न आएको छ ।

पोल्याण्ड जान प्रतिव्यक्ति साढे आठ लाख लाग्ने र मासिक डेढ लाख आम्दानी हुने आश्वासनमा पीडितबाट पटकपटक गरी दुई लाख १५ हजार रुपैयाँ उठाएपछि उनी सम्पर्कविहीन भएकी थिइन् । 

काठमाडौं महानगरपालिका–३१ शान्तिनगर बस्ने रौतहटका ३२ वर्षे विन्दलालले पनि मलेसियामा आकर्षक तलब सुविधासहितको रोजगारी लगाइदिने प्रलोभनमा ठगेको प्रहरीले जनाएको छ । 

यता, ललितपुरको च्यासल बस्दै आएका उदयपुरका ४२ वर्षे विकासकुमार घले र काठमाडौंको सिनामंगल शम्भुमार्ग बस्ने ३९ वर्षे संजयले टोकियो ओभरसिस नामक संस्था दर्ता गरी विदेश पठाइदिने नाममा ठगेको पाइएको छ । 

उक्त संस्थामार्फत वैदेशिक रोजगारीका लागि सर्बिया पठाइदिने र त्यहाँ पुगेपछि प्रतिष्ठित होटलमा काम लगाइदिने प्रलोभनमा पीडितहरुबाट पटक-पटक गरी १३ लाख ५० हजार रुपैयाँ उठाएपछि उनीहरु फरार भएका थिए । 

आफूहरु ठगिएको थाहा पाएपछि पीडितहरु उजुरी लिएर वैदेशिक रोजगार विभाग पुगेका थिए हुन् । विभागकै अनुरोधमा प्रहरीले खोजतलास अघि बढाउँदा उनीहरु पक्राउ परेको जनाइएको छ । यस सम्बन्धमा थप अनुसन्धान भइरहेको प्रहरीले जनाएको छ ।