फोटो सार्वजनिक भएपछि ‘गौशाला २६’ साइबर ब्यूरोमा, छानबिन शुरु

क्रिकेटर सन्दिप लामिछानेबाट पीडित किशोरी ‘गौशाला २६’ को तस्वीर सामाजिक सञ्जालमार्फत सार्वजनिक गर्नेविरुद्ध नेपाल प्रहरीको साइबर ब्यूरोले छानबिन अघि बढाएको छ । 

जिल्ला अदालत काठमाडौँले लामिछानेलाई बलात्कार मुद्दामा दोषी ठहर गरेपछि उनका समर्थकहरुले पीडितको तस्वीर सार्वजनिक गरेका थिए । त्यसविरुद्ध ब्यूरोले अनुसन्धान थालेको हो । 

ब्यूरोका प्रवक्ता प्रहरी उपरीक्षक पशुपतिकुमार रायका अनुसार पीडित ‘गौशाला २६’ ले आज उजुरी दिएकी छिन् । उजुरीपश्चात् अनुसन्धान भइरहेको उनले जानकारी दिए । ‘पीडितले आज उजुरी दिनुभएको छ । ब्यूरोले यसबारे अनुसन्धान गरिरहेको छ’, उनले भने । 

गत पुस १३ गते जिल्ला अदालतका न्यायाधीश शिशिरराज ढकालको इजलाशले लामिछानेलाई दोषी ठहर गरेको थियो । हिजो अदालतले उनलाई आठ वर्षसम्म कैद, तीन लाख रुपैयाँ जरिवाना र दुई लाख रुपैयाँ क्षतिपूर्ति तोकेको थियो । त्यसपछि लामिछानेका समर्थकहरुले सामाजिक सञ्जालमार्फत पीडितको वास्तविक तस्वीर सार्वजनिक गरेका हुन् । 

यता, राष्ट्रिय स्वतन्त्र पार्टी (रास्वपा) ले पीडितको तस्वीर सार्वजनिक गर्ने कार्यकर्तालाई कारबाही गरेको छ । पार्टीको प्रवास नेपाली सम्पर्क विभाग, जापान च्युबू शाखा समितिका सदस्य दिवस सापकोटालाई रास्वपाले पदीय जिम्मेवारीबाट निलम्बन गरेको हो ।