रेशम चौधरी नागरिक उन्मुक्तिको अध्यक्षमा निर्विरोध

नागरिक उन्मुक्ति पार्टीको संरक्षक रहेका रेशम चौधरी अध्यक्षमा निर्विरोध भएका छन् । 

कैलालीको टिकापुरमा हिजोदेखि जारी महाधिवेशनको बन्दसत्रमा उम्मेदवारी दर्ताको निर्धारित समयभित्र उनको मात्र उम्मेदवारी परेपछि निर्विरोध भएका हुन् । निर्वाचन समितिका अनुसार उम्मेदवारी मनोनयन दर्ताका लागि दिउँसो २ बजेसम्म समय तोकिएकोमा चौधरीको मात्र उम्मेदवारी परेको छ । 

महाधिवेशनले अध्यक्षसहित एक सहअध्यक्ष, सात उपाध्यक्ष, एक महासचिव, सात सचिव, सोही संख्यामा सहसचिव र एकजना कोषाध्यक्ष गरी ३३ सदस्यीय पदाधिकारीसहित केन्द्रीय समिति चयन गर्ने छ । 

टीकापुर हत्याकाण्डमा जेल परेका रेशम चौधरीले डिल्लीबजार कारागारबाटै पत्नी रञ्जिता श्रेष्ठको अध्यक्षतामा नागरिक उन्मुक्ति पार्टी गठन गरेका थिए । गत जेठ १५ गते गणतन्त्र दिवसको अवसरमा राष्ट्रपतिबाट आममाफी पाएर थुनामुक्त भएपछि उनी अहिले राजनीतिमा सक्रिय छन् । 

पार्टी गठनको केही समयमै चुनावमा गएको सो पार्टीले प्रतिनिधिसभातर्फ चार सिट जितेर अहिले सरकारमा छ ।