प्रभुका कार्यकर्ताले मधेसमा मसाल जुलुस निकाल्ने

प्रभु साह नेतृत्वको आम जनता पार्टी (आजपा) ले बैंक तथा वित्तिय संस्थाको चर्को ब्याज असुलीविरुद्ध मसाल जुलुस निकाल्ने भएको छ । 

आजपाको मधेश प्रदेश कमिटीले बैंक तथा वित्तिय संस्थाको मनोमानी ब्याज असुलीविरुद्ध आउँदो माघ १० गते मधेशका सबै जिल्लामा मसाल जुलुस निकालेर विरोध प्रदर्शन गर्न लागेको हो । 

त्यस्तै, माघ ११ गते मधेश प्रदेश बन्द गर्ने प्रदेशका अध्यक्ष उमेश कुशवाहाले बताए । बैंकहरुले लिइरहेको मनोमानी ब्याज फिर्ता, लघुवित्त तथा सहकारीहरुको सम्पूर्ण ऋण मिनाहा तथा आम नागरिकलाई सहज कर्जा दिने व्यवस्था नगरेसम्म चरणबद्ध रुपमा विरोध प्रदर्शन गर्ने उनको भनाई छ । 

बैंक तथा सहकारीको चर्को ब्याज फिर्ता लिन माग गर्दै सो पार्टीका कार्यकर्ताले गत मंसिर २० गते बृहत विरोध प्रदर्शन गरेको थियो । उनीहरुले जनकपुरस्थित नेपाल राष्ट्र बैंकको प्रादेशिक कार्यालय घेराउसमेत गरेका थिए ।