पहिचानको मुद्दामा जनजातिले साथ नदिएको प्रधानमन्त्रीको गुनासो

प्रधानमन्त्री पुष्पकमल दाहाल प्रचण्डले आदिवासी जनजाति समुदायले आफ्नो वास्तविक राजनीतिक अभिभावक चिन्न नसके उनीहरुका मुद्दा स्थापित गर्न कठिन हुने बताउनुभएको छ । 

आदिवासी जनजाति आयोगको तेस्रो स्थापना दिवसका अवसरमा आयोजित कार्यक्रममा उहाँले सो धारणा राख्नुभएको हो । प्रधानमन्त्रीले आफ्नो नेतृत्वबारे अन्यौल नहुन जनजाति समुदायलाई सुझाव पनि दिनुभयो ।

राजनीतिक नेतृत्व चिन्न नसके प्राप्त अधिकार रक्षा गर्न कठिनाई हुने उल्लेख गर्दै प्रधानमन्त्री प्रचण्डले भन्नुभयो, 'जुन राजनीतिक शक्ति र नेतृत्वले पहिचान र अधिकारको मुद्दा उठायो, त्यसका पक्षमा दृढथतापूर्वक सङ्घर्ष गर्‍यो, निकै ठूलो वैचारिक बहस र कानुनी लडाइँमा विजय हासिल गरेर ती अधिकारहरू संविधानमा लिपिवद्ध गर्‍यो, त्यो शक्ति र नेतृत्वलाई चिन्न सकिएन भने प्राप्त अधिकार रक्षामा प्रश्न खडा हुन्छ ।' 

क्रान्ति र परिवर्तनकारी शक्तिको विचार, राजनीति र सङ्गठनमा गोलबन्द हुन नसके प्रतिक्रान्तिकारी शक्तिले टाउको उठाउने भएकाले त्यसतर्फ ध्यान दिन प्रधानमन्त्रीको विशेष आग्रह छ । राजनीतिक रूपमा पहिचान र अधिकार नरूचाउने शक्तिहरूमा आवद्ध हुने तर अधिकारको माग परिवर्तनकारी शक्तिसँग गर्ने विरोधाभाषबाट माथि उठ्न उहाँले जनजातिहरुलाई सल्लाहसमेत दिनुभयो ।

आदिवासीहरु स–साना स्वार्थ त्यागेर बृहत्तर हितका पक्षमा संगठित हुनुपर्नेमा जोड दिँदै प्रधानमन्त्रीले सही नीति, विचार र नेतृत्व छनोट गर्न सक्नुपर्नेमा पनि जोड दिनुभयो । संसद् र नीति निर्माणको तहमा परिवर्तनकारी शक्ति कमजोर हुँदा जनजातिका मुद्दामाथि प्रतिगामी शक्तिहरूबाट बारम्बार हमला भएकाले त्यसतर्फ सचेत रहन प्रधानमन्त्रीले आग्रह गर्नुभयो ।