सवा दुई अर्ब छली यता, खाने डिजी उता

पोखरा क्षेत्रीय अन्तर्राष्ट्रिय विमानस्थलको निर्माणमा सवा दुई अर्ब रुपैयाँ तलमाथि गरिएको विषयबारे काठमाडौंमा छलफल शुरु भएको छ । महालेखा परीक्षकको कार्यालयमा पोखरा विमानस्थल निर्माणको क्रममा भएको अनियमितताबारे हिजो दिउँसो छलफल भएको थियो । 

संयोगवशः अनियमितताको आरोप लागेका नागरिक उड्डयन प्राधिकरणका महानिर्देशक प्रदीप अधिकारी हिजै एकाएक सिंगापुरतर्फ प्रस्थान गरेका छन् । विमानस्थल निर्माणको क्रममा उनै अधिकारी मुख्य हर्ताकर्ता थिए । अधिकारीले तत्कालीन अर्थमन्त्री वर्षमान पुनसँग मिलेर भन्सार तिरेको देखाउँदै २ अर्ब २२ करोड हिनामिना गरेको प्रारम्भिक अनुसन्धानबाट खुलेको छ । 

महालेखा परीक्षकको ६० औं वार्षिक प्रतिवेदन २०७९ को बुँदा नम्बर ८९ र ६१२ मा अधिकारीले गरेको आर्थिक अनियमितासम्वन्धी विस्तृत विवरण दिइएको छ । उनले निर्माण सामाग्रीहरु बाहिरबाट आयात गरिने सम्झौतामा उल्लेख गराएका थिए । बालुवा, रोडा र सिमेन्टसमेत उतैबाट ल्याउने भनिएकोमा पछि पोखरा नजिकैका नदी र खानीबाट ल्याइएका बालुवा र रोडा प्रयोग गरिएको थियो ।

सोही बालुवा, सिमेन्ट र रोडा उताबाट ल्याइएको भन्दै भन्सार तिरेको नक्कली कागजातको आधारमा २ अर्ब २२ करोड ४० लाख १६ हजार २०२ रुपैयाँ भन्सार छुट लिइएको हो । सोही विषयमा महालेखामा हिजो छलफल भएको बताइएको छ ।