कांग्रेस महासमिति बैठकमा चार समूह, पाँच प्रतिवेदनमा धारणा राख्न पाँच मीनेट

सत्तारुढ दल नेपाली काँग्रेसको महासमिति बैठकमा चार वटा समूह बनाएर छलफल शुरु भएको छ । 

बैठकमा पेश भएका प्रतिवेदनमाथि छलफल गर्न २ हजार २ सय बढी प्रतिनिधिलाई चार समूहमा विभाजन गरिएको हो । समूहगत छलफलमा आज सबै सहभागीहरुले धारणा राख्ने व्यवस्था मिलाइएको बताइएको छ । त्यसका लागि प्रत्येक प्रतिनिधिलाई ५ मिनेटको समय तोकिएको छ । 

ललितपुरको गोदावरीमा सोमबारदेखि शुरु भएको बैठकमा हिजो छलफलका लागि प्रतिवेदन पेश गरिएको थियो । उपसभापति पूर्णबहादुर खड्काले नीतिगत प्रतिवेदन, महामन्त्रीद्वय गगनकुमार थापा र विश्वप्रकाश शर्माले क्रमशः सांगठनिक र समसामयिक राजनीतिक प्रतिवेदन पेश गरेका थिए । 

प्रवक्ता डा. प्रकाशशरण महतले देशको वर्तमान आर्थिक, अवस्था, सम्भावना र भावी योजना तथा लेखा समिति संयोजक श्यामकुमार घिमिरेले लेखा परीक्षण प्रतिवेदन प्रस्तुतु गरेका छन् । 

महासमिति बैठक फागुन १० गते बिहीबारसम्म सञ्चालन हुनेछ ।