बिहान माधवप्रति आक्रोशित एमाले अध्यक्षद्वारा साँझ मन्त्री ज्वालाको विरोध

नेकपा एमालेका अध्यक्ष केपी शर्मा ओलीले एउटा मन्त्रीलाई जोगाउन सरकार अलोकतान्त्रिक पद्धतिमा अघि बढेको बताउनुभएको छ । 

आज साँझ पार्टी मुख्यालय च्यासलमा केन्द्रीय कमिटी बैठकको समापन समारोहलाई सम्बोधन गर्दै उहाँले सो भनाइ राख्नुभएको हो । बालकुमारी घटनामा दोषी ठहर भइसक्दा पनि भौतिक पूर्वाधार तथा यातायातमन्त्री प्रकाश ज्वालाले पद नछाडेको र उनलाई जोगाउन लोकतान्त्रिक पद्धति मिच्ने काम भएको अध्यक्ष ओलीको दावी छ । 

घटनाको छानबिन गर्न सरकारले नै गठन गरेको जाँचबुझ आयोगले मन्त्री ज्वालालाइ दोषी देखाएर प्रतिवेदन बुझाए पनि प्रधानमन्त्रीले उनलाई बर्खास्त गर्न नसकेको भन्दै आक्रोश व्यक्त गर्नुभयो । दोषी ठहर हुँदापनि कारबाही नहुनु अलोकतान्त्रिक पद्धति भएको ओलीको भनाई छ । 

‘मान्छे मरेका छन्, युवाहरु मरेका छन् । युवा मारिएको विषयमा प्रतिवेदनले भन्छ मन्त्री दोषी छ, पहिलो पटक दुनियाँको इतिहासमा यस्तो सुनिँदैछ, सायद यस्तो हुँदैन । लोकतन्त्र मान्ने प्रणालीमा यस्तो हुँदैन । मन्त्री दोषी छ जसले गर्दा युवा मारिए । आफैँले सरकारले बनाएको आयोगले तोकेको छ, दोषी मन्त्री छ । मन्त्री फुर्तिसाथ हिँड्छ । आत्मग्लानी छँदै छैन । न सरकारलाई, न मन्त्रीलाई’, उहाँले आक्रोशित हुँदै भन्नुभयो ।  

अध्यक्ष ओलीले मन्त्रीलाई कारबाही नगरेर प्रधानमन्त्री र सिङ्गै गठबन्धन निर्लज्ज भई बसेको आरोप पनि लगाउनुभयो । भन्नुभयो, ’प्रधानमन्त्रीलाई अफ्ठ्यारो भएको छैन । मन्त्रीले राजीनामा नगरे हटाउनु पर्दैन । मन्त्री निर्लज्ज भयो भने निर्लज्ज हुने, गठबन्धन नै निर्लज्ज हुने ।’

एउटा सानो दलको स्वार्थमा सिंगो देश अलोकतान्त्रिक भएको बताउँदै ओलीले एकीकृत समाजवादीमाथि कटाक्ष पनि गर्नुभयो । आज बिहान च्यासलमै आयोजित अर्को एक कार्यक्रममा पनि उहाँ एकीकृत समाजवादीका अध्यक्षमाथि खनिनुभएको थियो ।  

आफू नेतृत्वको तत्कालीन नेकपाको सरकार ढालेर दक्षिणपन्थीको पाउमा बुझाएको भन्दै उहाँले माधव नेपालसँग कहिल्यै पार्टी एकता नहुने घोषणासमेत गर्नुभएको थियो ।