बिनोद चौधरीले दयाहाङ्ग राईलाई व्यंग्य हानेपछि ..

विवादास्पद व्यवसायी विनोद चौधरीले आफ्नो एक वर्षको कमाइभन्दा एउटा फिल्मको कमाई बढी हुने भन्दै कलाकार दयाहाङ राईलाई व्यंग्य गरेका छन् । उनले आज फेसबुकमा २८ सेकेण्डको भिडियो शेयर गर्दै युवा पुस्ताका चर्चित कलाकार दयाहाङलाई कटाक्ष गरेका हुन् । 

भिडियोमा कलाकार दयाहाङ र माओत्से गुरुङको संवाद सुन्न सकिन्छ:  

दयाहाङ भन्छन्, 'त्यो सीजी ग्रुप सुन्या छौ ? चाउचाउ बनाउँछ नि ! यसले मलाई मासिक चार लाखको अफर गर्‍या थ्यो ।'

'तैंले किन खाइनस् त ?', माओत्से प्रश्न गर्छन् । 

फेरि दयाहाङ जवाफ दिन्छन्, 'चौधरी आफैं धनी छ,धनीमाथि धनी के बनाऊँ ?'

उक्त भिडियो चौधरीले 'डिग्री माइला' चलचित्रको ट्रेलरबाट काटेर साभार गरेको बताइन्छ । 

यो भिडियो शेयर गर्दै चौधरीले दयाहाङलाई भनेका छन्, 'मैले एक बर्षमा कमाउने त तपाईंले यही एउटै फिल्मबाट कमाउनुहुन्छ होला जस्तै छ त दयाहाङ जी,हैट।' 

त्यसो त,चौधरी नेपालका कर कम तिर्ने तर धन धेरै भएक पात्र हुन् । उनको सम्पति १.८ बिलियन डलर छ । जुन नेपालीमा सरदर २ खर्ब ४० अर्ब हुन आउँछ । फोर्ब्सको अनुसार हिसाब गर्ने हो भने चौधरीको दैनिक आम्दानी नै सरदर ८ देखि १० करोड देखिन्छ । तर उनै चौधरीले सिजी ग्रुपको प्रचार गर्ने बहानामा कलाकारलाई अपाच्य व्यंग्य गरेको दर्शकहरुको टिप्पणी छ । 

विवेक श्रेष्ठले लेखेका छन्, 'यसरी सटायर हान्नुको सट्टा धन्यवाद दिनुहोस् विनोध चौधरी सर ।' 

केहीले भने व्यवसायी चौधरी सरकारी जग्गा हडपेर धनी भएको जिकिर गरेका छन् । रामकुमार भुजेलले लेखेका छन्, 'चाउचाउले धनी भएको होइन,काङ्ग्रेसको छत्रछायामा सरकारी जग्गा हडपेर धनी भएको हो ।' 

भावना मल्ल बस्नेतले भने सिजी ग्रूपको खाध्य प्रोडक्टले जनतालाई ठग्दै गएको बताएकी छन् । उनी भन्छिन्, 'चाउचाउ अल्लि बढि हाल्नुहोला ।  पहिले दुई जनालाई हुने,अहिले एक जनालाई नि हुन्न ।'

सौरभ अधिकारीले भने आफ्नो व्यवसाय चलाउनको लागि सस्तो स्टन्टबाजी बन्द गर्न सुझाव दिएका छन् । उनी भन्छन्, 'चुप्,बाँसवारी काण्ड ।' 

चित्राङ्ग आलेले चौधरीलाई कर ठगेको उल्लेख गर्दै कलाकार दयाहाङसँग तुलना गर्नै नमिल्ने बताएका छन् । उनी भन्छन्, ‘निर्माता र कलाकारले ट्याक्स तिर्छन् बुढा, तिमी त ट्याक्स ठगेर धनी भयौ ।’ 

अशोक चाम्लिङ राईले पनि कलाकार दयाहाङलाई हिरा र चौधरीलाई धमिराको संज्ञा दिएका छन् । लेखेका छन्, ‘जनतालाई थाहा भइसक्यो तिम्रा नियतिहरु, कसरी देशलाई लुटेर कालोधन थुपारेको छौ भन्ने कुराहरु । दयाहाङ भनेको देशको हिरा हो, तर तिमी देशको धमिरा हौ ।’

स्मरण रहोस्, चौधरी लामो समयदेखि कर छली र सार्वजनिक जग्गा अतिक्रमण लगायतका विषयमा विवादमा पर्दै आएका छन् । गत माघमा पनि उनको चौधरी ग्रुपले बाँसबारी छालाजुत्ता कारखानाको सरकारी जग्गा हडपेको पुष्टि भएको थियो । उक्त जग्गा हिनामिना प्रकरणमा विनोद चौधरी मुख्य योजनाकार देखिए पनि माघ १८ गते उनका भाइ अरुण चौधरी मात्र पक्राउ परेका थिए । 

अहिले पनि अख्तियार दुरुपयोग अनुसन्धान आयोगले यो प्रकरणमा छुट्टै अनुसन्धान गरिरहेको बताइन्छ ।