किर्ते कागज बनाउँदै ऋण प्रवाहमा लघुवित्तका कर्मचारी व्यस्त

ग्रामीण विकास लघुवित्त वित्तीय संस्था लिमिटेडका वरिष्ठ फिल्ड सहायक उदयकृष्ण अधिकारी भ्रष्टाचारमा तानिएका छन् । किर्ते कागज बनाएर ऋण प्रवाह गरेको अभियोगमा अख्तियार दुरुपयोग अनुसन्धान आयोगले आज विशेष अदालतमा उनीविरुद्ध मुद्दा दर्ता गरेको छ । 

अधिकारीले किर्ते सदस्य बनाएर बिना धितो कर्जा दिएको, ऋणीबाट साँबाब्याज असुलेर पनि नदेखाएको तथा सोबाट जग्गा खरिद गरेको र कर्जा दिँदा कमिशन खाएको अख्तियारको आरोप छ । अनुसन्धानको क्रममा उनले आर्थिक वर्ष २०६८–०६९ देखि संस्थाको १९ लाख २ हजार २३७ रुपैयाँ अपचलन तथा हिनामिना गरेको खुलेको अख्तियारले जनाएको छ । 

अख्तियारले अदालतमा दायर गरेको आरोप पत्रमा भ्रष्टाचार निवारण ऐन, २०५९ को दफा १७ बमोजिम उक्त रकम जफतसहित कैद र जरिवानाको मागदाबी गरिएको छ । त्यस्तै, २० लाख रुपैयाँ बिगो पनि मागिएको छ ।