सुनियोजित हल्लाप्रति झलनाथ खनालको दुःखेसो

पूर्वप्रधानमन्त्री एवम् नेकपा एकीकृत समाजवादीका सम्मानित नेता झलनाथ खनालले पार्टी विभाजन गर्न खोजेको भनेर सुनियोजित रुपमा आफूविरुद्ध फैलाइएको हल्लाप्रति दुःखेसो व्यक्त गर्नुभएको छ । उहाँले केही अवाञ्छित, स्वार्थी र कम्युनिष्ट विरोधी तत्वहरुले सुनियोजित रुपले यस्तो प्रचार गरेको बताउनुभएको छ । 

‘केही दिनदेखि हाम्रो गौरवमय पार्टी नेपाल कम्युनिष्ट पार्टी (एकीकृत समाजवादी) पनि विभाजित हुँदैछ, ६ जना सांसद लिएर झलनाथ खनालले संसदीय दल फुटाउँदै छन् भन्ने हल्ला बडो तीव्र रुपले फैलाइएको छ,’ उहाँले जारी गर्नुभएको विज्ञप्तिमा भनिएको छ, ‘केही अवाञ्छित, स्वार्थी र कम्युनिष्ट विरोधी तत्वहरुले सुनियोजित रुपले यस्तो प्रचार गरेका छन् । त्यसले पार्टी व्यापी रुपमा एउटा भ्रमको कुहिरो फैलाइदियो ।’

खनालले पार्टी दशौं राष्ट्रिय महाधिवेशनको सम्मुखमा पुगिरहेको उल्लेख गर्दै पार्टी विरोधी छुद्रतापूर्ण प्रचारबाट होसियार रहन पनि आग्रह गर्नुभएको छ । भन्नुभएको छ, ‘हाम्रो पार्टी देशको प्रधान वर्गीय र राजनीतिक प्रधान अन्तर्विरोधहरु पहिचान गर्दैछ, क्रान्ति र अग्रगतिको प्रमुख बाधा के हो त्यसको पहिचान गर्दैछ, देशको समाजवादी क्रान्तिका कार्यदिशा, नीति र सिद्धान्तलाई परिस्कृत  र परिमार्जित गर्दैछ, क्रान्तिकारी कार्यदिशाका आधारमा पार्टी एकता र कम्युनिष्ट एकतालाई विस्तार गर्ने आधार निर्माण गर्दैछ, देशी विदेशी प्रतिक्रियावादीहरुको भण्डाफोर गर्दै नेपाली जनतालाई समाजवादको समृद्ध भविष्यतिर अघि बढ्ने मार्ग प्रदर्शन गर्दैछ । त्यसैकारण पार्टीभित्र र बाहिरका दक्षिणपन्थी र षड्यन्त्रकारी तत्वहरु आतंकित भएका छन् । उनीहरु प्रतिक्रियावादीहरुका मक्किसकेका र थोधिसकेका झुटा प्रचारका हतियारहरु लिएर हाम्रो पार्टीका विरुद्ध आइलाग्न कोशिस गर्दैछन् ।’

उहाँले पनि वर्तमान सत्ता समीकरणप्रति समर्थन रहेको उल्लेख गर्नुभएको छ ।