महानगरले डोजर लगाएपछि अख्तियार आयुक्तले रिसिइबी साँधेको मेयरको आरोप

ललितपुर महानगरपालिकाका मेयर चिरिबाबु महर्जनले आफूमाथि अख्तियार दुरुपयोग अनुसन्धान आयोगका आयुक्त सुमित्रा अमात्यले रिसिइबी साँधेको बताएका छन् । महर्जनलाई आयोगले आगामी बुधबार बयानका लागि बोलाएपछि उनले उक्त प्रतिक्रिया दिएका हुन् ।

स्थानीय पहिरोपीडितलाई तीन वर्षअघि दिइएको राहत र प्रेस संयोजक नियुक्तिको विषयमा अख्तियारले प्रश्न उठाउँदै उनलाई बयानका लागि बोलाएको छ । महर्जनले २०७८ सालमा वडा नम्बर २४ धापाखेलमा गएको पहिरो प्रभावित परिवारलाई महानगरको तर्फबाट एक लाख ५० हजारदेखि साढे दुई लाख रुपैयाँसम्म उपलब्ध गराएको थियो । 

यसअघि महानगरले अस्ति आयुक्त अमात्यले चाकुपाटस्थित सरस्वती मन्दिर परिसर अतिक्रमण गरेर बनाएको घरको गेट र पर्खालमा डोजर चलाएका थिए । गेट र पर्खाल भत्किएपछि आफूमाथि अमात्यले प्रतिशोध साँधेको मेयरको भनाई छ । उनले भने, ‘मेरो उपस्थितिमा महानगरले अतिक्रमित संरचना भत्काएको हो ।’ अमात्यका परिवारले भने महानगरले अतिक्रमण नै नभएको संरचना भत्काएको आरोप लगाएको छ ।

मेयर महर्जनलाई आयोगले हिजो पत्र बुझाएको हो ।