भागेका भरतको सुमेरु पूर्वराजाका ज्वाइँले सकार्ने

बचतकर्ताको अर्बौं रूपैयाँ हिनामिना गरेर बेलायततिर ‘फरार’ भरत महर्जनको ‘सुमेरु सहकारी समूह’ पूर्वराजा ज्ञानेन्द्र शाहका एक मात्र छोरी ज्वाइँ राजबहादुर सिंहले सकार्न लागेका छन् । उनले ‘सुमेरु ग्रुप’ अन्तर्गत रहेको सुमेरु सिटी अस्पताल, एशियन कलेज, शंकरापुर कलेज, सुमेरु मार्टलगायतका दर्जनौं कम्पनी लिने कागजमा सही गरेका छन् ।

असार ३ गते ललितपुरमा सम्पन्न सुमेरु सेभिङ एण्ड क्रेडिट को–अपरेटिभ लिमिटेडको २३ औं वार्षिक साधारण सभाबाट उनले सबै कम्पनी आफूले सकार्ने र बचतकर्ताको रकम फिर्ता दिने सहमति गरेको बुझिएको छ । आगामी साउन १५ गतेबाट स–साना बचतकर्ताको बचत फिर्ता दिन थाल्ने सहमति हेटौंडास्थित सहकारी रजिष्ट्रार कार्यालयलाई दिइएको जानकारीमा उल्लेख छ ।

 

सहमतिपत्रमा राजबहादुर र हेमराज दाहालले हस्ताक्षर गरेका छन् । यसैबमोजिम उनका प्रतिनिधि हरिश चन्द सहकारीको उपाध्यक्षमा राखिएका छन्् । साधारण सभाबाट नयाँ सञ्चालक समिति र लेखा समिति गठन गरिएको छ । अध्यक्षमा ३०% वाला भरतनिकट ललितपुर महानगरपालिका २३, धापाखेल बस्ने वीरेन्द्र महर्जन आएका छन् । उनको नेतृत्वमा सात सदस्यीय सञ्चालक समिति गठन भएको छ । उपाध्यक्षमा हरिश चन्द, सचिवमा ओर्थिल गुरुङ्ग, मनाङ्ग थैग, कोषाध्यक्षमा राजन राई, सदस्यमा गोकुलबहादुर रोकाया, ध्रुवबहादुर शाह र अनिल मल्ल छन् । 

त्यसैगरी, लेखा समितिको संयोजक दिनेश ज्यू तोकिएका छन् । सदस्यमा एकराज बराल र मित्रलाल चौधरी रहेका छन् । भरत सहकारीमा बचत भएको ३३ हजार सर्वसाधारणको १० अर्ब हिनामिना गरेर झण्डै डेढ वर्षदेखि बेलायतमा लुकी बसेका छन् ।  सहकारी समस्याग्रस्त बनाएपछि उनले अर्को व्यक्तिलाई जिम्मा लगाएर हिंडेका हुन् । उनीविरुद्ध अन्तर्राष्ट्रिय प्रहरी संगठन (इन्टरपोल) महासचिवालयबाट रेड नोटिस जारी भइसकेको छ ।

(साभार:जनआस्था साप्ताहिकबाट)