योगेश भट्टराईको 'हिँसा' शब्द रेकर्डबाट नहटेपछि संसदमा लफडा

नेकपा (एमाले)का सांसद योगेश भट्टराईले प्रयोग गरेको ‘हिंसा’ शब्द संसदको रेकर्डबाट नहटाएपछि प्रमुख प्रतिपक्ष दल माओवादी केन्द्रले आपत्ति जनाएको छ । 

सांसद भट्टराईले भदौ १२ गतेको प्रतिनिधि सभा बैठकमा १० वर्षे जनयुद्धलाई ‘माओवादी हिंसा’ भनेका थिए । त्यसप्रति माओवादी केन्द्रका सांसदहरुले आपत्ति जनाउदै सभामुख देवराज घिमिरेसमक्ष ‘हिंसा’ शब्दलाई संसदको रेकर्डबाट हटाउन माग गरेका थिए । 

तर, आजको बैठकमा सभामुख घिमिरिले हिंसा शब्द संसदको रेकर्डबाट हटाउन आवश्यक नदेखिएको जानकारी गराएपछि नोकझोक शुरु भएको हो । 

माओवादी केन्द्रका सांसद हितराज पाण्डेले संविधानमै जनयुद्ध र सशस्त्र संघर्ष भनेर किटान गरिएको शब्दलाई हिंसाको संज्ञा दिएर सरकारले सहिदहरुको अपमान गर्न खाजेको बताए । 

उनले भने, ‘जनयुद्ध जसरी शान्ति प्रक्रिया हुँदै आजसम्म आइपुग्यो, हामीले संविधानमा बाख्या गरिएको विषयलाई गलत ढंगले बाख्या गरिनु संविधानविपरित हो । संविधानभन्दा बाहिर कोही जान सक्दैन । नत्र संविधानको बर्खिलाप हुन्छ । मैले संविधानको कुरा उठाइरहेको छु । सचिवायले जुन बाख्या गर्यो, कुन संविधान हेर्यो ?’

त्यस्तै, अर्का सांसद देवेन्द्र पौडेलले जनयुद्धको विषयमा संविधानको प्रास्तवना नै पढेर सुनाए । भने, ‘संविधानकाृे प्रस्तावना २ जनयुद्धको विषयमा स्पष्ट बाख्या गरिएको छ, के हामी संविधानभन्दा बाहिर गएर संसद चलाउने हो  ? सभामुखले पनि संविधानविपरित रुलिंग गर्न मिल्छ ?’

एमालेका सांसद रघुजी पन्तले भने हिंसा शब्द कुनै पनि दृष्टिकोणले असंसदीय नभएको जिकिर गरे । ‘मैले पहिलेका संसदमा पनि थुप्रै पटक हिंसा बोलेको छु, फर्केर हेरौ, अरु थुप्रै मान्यहरुले बोल्नु भएको छ, हिंसा शब्द कुनै पनि ढंगले असंसदीय हैन’, उनले भने । 

'हिँसा'शब्द संसद्को रेकर्डबाट हटाउन माग गर्दै माओवादी सांसदहरुले अवरोध जारी राखेपछि बैठक स्थगित गरिएको छ ।